“Дүнжингаравын хурд-2014” уралдааны шилдэг унаач А.Алтанхуяг: Энэ наадмаас хоёр айраг хүртлээ

“Дүнжингаравын хурд-2014” хаврын бүсийн уралдааны “Шилдэг унаач” шагналын эзэн болсон Алимаагийн Алтанхуягтай хоромхон зуур хөөрөлдлөө. Тэрээр энэ уралдааны эрлийз ангилалд МУ-ын Алдарт уяач Дайдийхүүгийн Баяраагийн зээрд, соёолон насанд МУ-ын Алдарт уяач Б.Буяннэмэхийн саарал үрээг унаж айрагдуулсан юм.
-Шилдэг унаачид баяр хүргэе. Манай уншигчдад өөрийгөө танилцуулахгүй юу?
-Баярлалаа. Намайг Алимаагийн Алтанхуяг гэдэг. Би 14 настай. Наймдугаар ангид сурдаг. Өнөөдөр Дүнжингарав уралдаанд унасан морьдоо эрлийз ангилалд гуравлуулж, бас соёолон насанд дөрөвлүүлсэн.
-Ер нь хэдэн наснаасаа эхэлж хурдан морь унаж байгаа вэ?
-10 настайгаасаа. Дөрвөн жил унаж байна.
-Хурдан морь унаж сурахад хэн нөлөөлж, сургасан бэ?
-Манлай уяач Одгэрэл ах маань хурдан морь унахыг зааж өгсөн. “Унаган хурд” галд манай ахын хүүхэд нь хурдны морь унадаг байсан юм. Агаа намайг “Унаган хурд” галд морь уна гэсэн. Тэгээд л энэ галын унаач болсон доо. Голдуу Буяннэмэх ахын морьдыг унадаг. Энд ирэхээсээ өмнө аавынхаа уясан морьдыг унаж овооны наадам түрүүлж, сургуулийн ойд тус тус түрүүлж байсан. Манайх Партизаны айл.
-10 настайгаасаа хурдны морь унасан гэсэн. Анх ямар наадамд хэний уясан морийг унаж ямар амжилт үзүүлж байсан бэ?
-2010 онд Эрдэнэтэд их насны цагаан морио унаж айргийн гурваар давхиулж байсан. Буяннэмэх ахын морь л доо. Ер нь Буяннэмэх, Одгэрэл нарын уяачдын морийг дөрвөн жил унаж байна.
-Өөр ямар хурдны морьд унаж хаана, хаана хурдлуулж байв?
-Завхан аймгийн Дөрвөлжин сумын уугуул Дайдийхүүгийн Баяраагийн Шувуухай хүрэнг хязаалан үрээ азарганд унаж түрүүлж байсан, Өвөрхангайн зүүн бүсийн наадамд.
-Хамгийн хол нь хаана очиж наадсан бэ?
-Архангайд. Би хурдан морь унахдаа ойччих вий гэж боддог.
-Унаач хүүхдийн амь нас, аюулгүй байдлын талаар их ярьж, арга хэмжээ ч багагүй авч байна. Энэ бүхэн та бүхэнд хэр нийцтэй санагддаг вэ?
-Каск, хантааз гээд хамгаалалтын хэрэгсэлтэй болгосон нь таалагддаг.
-Одоо Өлзийт хороололд байдаг юм уу?
-Тийм. Өлзийт хороололд байдаг хурдны морь унадаг олон хүүхдээс Лхагваа, Өсөхөө, Эрдэнэхүү гуравтай илүү дотно.
-Өнөөдрийн энэ уралдаанд унаж хурдлуулсан морьдоо урьд нь ямар наадамд унаж амжилт гаргаж байсан бэ?
-Урьд нь унаж байгаагүй. Өнөөдөр л анх удаа унаж хурдлууллаа.
-Ярилцсанд баярлалаа. Дүүдээ илүү их амжилт гаргахыг хүсэн ерөөе.
У.Энхмаа