“Дүнжингаравын хурд-2014” уралдааны түрүү, айргийн хүлгэд

Усан морин жилийн анхны улсын бүсийн уралдаан өчигдөр боллоо. Тодруулбал, Монголын Морин спорт уяачдын холбооны санал санаачилгын дагуу Засгийн газрын шийдвэрээр зохион байгуулагддаг “Дүнжингаравын хурд-2014” уралдаан Цагаан хөтөлд амжилттай болж өндөрлөлөө. Энэ жилийн уралдаан нэг талдаа уралдаж, мөн нас өгсөж уралдуулахгүй гэх мэт хэд хэдэн онцлогтой болсон юм. Хавар оройхон болсон, дээр нь Өвөрхангайн бүс давхацсан болоод урьд жилүүдээс морьд арай цөөн уралдлаа. Энэ удаагийн хаврын  уралдаанд Өмнөговьчууд өмтэй сайхан наадаж хоёр түрүү хүртсэн бол Дундговьчууд нэг түрүү, гурван айраг хүртлээ. Хурдан морьдын  уралдаан эрлийз морьдоор эхэлж азарга, их нас, соёолон насны нийт 430 гаруй хурдан хүлэг тоосоо өргөв. Ингээд энэ наадамд түрүүлж, айрагдсан морьдын цувааг хүргэж  байна.
Эрлийз нас
1. Завхан аймгийн Эрдэнэхайрхан сумын харьяат, МУ-ын Алдарт уяач Намжилцэрэнгийн Даш-Өлзийгийн зээрд. Найман настай Хишигжаргалын Содномдорж унаж хурдлуулсан.
2.Төв аймгийн Батсүмбэр сумын харьяат, Тод манлай Цогтын Батсайханы өсгий цагаан хонгор. 12 настай Отгонбаатарын Намхайнямбуу унаж хурдлуулав.
3. Завхан аймгийн Дөрвөлжин сумын харьяат, МУ-ын Алдарт уяач Дайдийхүүгийн Баяраагийн зээрд. 13 настай Алимаагийн Алтанхуяг унаж хурдлуулсан.
4. Төв аймгийн Баян сумын уугуул, Манлай уяач Миеэгомбын Энхболдын Бэлэвсэн зээрд. Найман настай Жаргалын Дашзэвэг унаж хурдлуулсан.
5. Увс аймгийн Улаангом сумын уугуул, “Сэтгэшгүй трейд” ХХК-ийн захирал Лувсаннямын Гансүхийн Элбэг хээр. 14 настай Цасхүүгийн Алтанхундага унаж тус тус хурдлууллаа.
Азарганы уралдаанд нийт 100 гаруй алтан туурт тоосоо өргөсөн. Тэднээс:
1. Өмнөговь аймгийн Ханхонгор сумын уяач Н.Энхболдын хүрэн. 31 дугаартай 10 настай Гэрэлт-Одын Цэрэнтогтох унаж хурдлуулсан.
2. Дорноговь аймгийн Улаанбадрах сумын уяач Х.Баатархүүгийн хээр. 2 дугаартай, 13 настай Пүрэвдоржийн Алтандаваа унаж хурдлуулсан.
3. Завхан аймгийн Завханмандал сумын уяач Ц.Мөнгөнхуягийн Янзаган зээрд. 107 дугаартай, 11 настай Пүрэвсүрэнгийн Мянганбаяр унаж хурдлуулсан.
4. Төв аймгийн Жаргалант сумын харьяат, аймгийн Алдар уяач Ч.Пүрэвийн Шонхор халтар. 68 дугаартай, 12 настай Ганбаатарын Отгонпунцаг унаж хурдлуулсан.
5. Тосонцэнгэл сумын уяач Т.Галбадрахын сартай зээрд. 18 дугаартай, 12 настай Дарийн Нацагдорж унаж хурдлууллаа.
Их насны уралдаанд газар газрын 169 хурдан хүлэг уралдсанаас:
1. Өмнөговь аймгийн Цогт-Овоо сумын уяач Төгөлдөрийн буурал. 120 дугаартай, 14 настай Эрэндамбын Дугарваанчиг унаж хурдлуулсан.
2. Баянхонгор аймгийн Баянбулаг сумын уугуул Ч.Махбалын халтар. 10 настай Пүрэвын Доржрагчаа унаж хурдлуулсан.
3. Дундговь аймгийн  Цагаандэлгэр сумын уугуул М.Алтанхуягийн халтар. 13 дугаартай, 9 настай Ганбатын Сумъяасүрэн унаж хурдлуулсан.
4. Дундговь аймгийн Хулд сумын уугуул, аймгийн Алдарт уяач С.Мөнхбатын хүрэн. 6 дугаартай, 12 настай Үүрийнтуяагийн Буман-Аюуш унаж хурдлуулав.
5. Дундговь аймгийн Луус сумын уугуул, аймгийн Алдарт уяач С.Шинэбаатарын хээр. 3 дугаартай, 11 настай Отгонбаярын Батболд унаж тус тус хурдалжээ. 
Хамгийн хурдан хүлэг болох соёолонгийн уралдаанд 130 гаруй хүлэг тоосоо өргөж  Дундговь аймгийн Хулд сумын уугуул, аймгийн Алдарт уяач Цэвэлсономын Ганхүүгийн сартай загасан тамгатай хонгор халзан үрээ түрүүлсэн боловч нас ахиулж уралдсан гэсэн шалтгаанаар хасагдсан юм.
1. Дундговь аймгийн Хулд сумын уугуул, аймгийн Алдарт уяач Д.Эрболдын Тэргүүн хонгор. 39 дугаартай Түмэнбаярын Отгондорж /13 настай/унаж хурдлуулсан.
2. Сүхбаатар аймгийн Халзан сумын уугуул, УИХ –ын гишүүн  Ж.Батзандангийн бор. 67 дугаартай Батмөнхийн Сэлэнгэзаяа/13 настай/ унаж хурдлуулсан.
3. Улаанбаатар хотын уугуул,  нийслэлийн Алдарт уяач Атарсайханы шарга халзан. 55 дугаартай, 13 настай Төмөрбаатарын Гонгор унаж хурдлуулав.
4. Ховд аймгийн Мөст сумын харьяат, МУ-ын Алдарт уяач Б.Буяннэмэхийн саарал. 90 дугаартай 14 настай Алимаагийн Алтанхуяг унаж хурдлуулсан. Алимаагийн Алтанхуяг нь “Дүнжингаравын хурд-2014” хурдан морины уралдааны“-Шилдэг унаач”-аар тодорсон юм.
5. Булган аймгийн Хутаг-Өндөр сумын уугуул Б.Дамдинбазарын хээр. 36 дугаартай 11 настай Амьбөхийн Барсхүлэгтбаатар унаж тус тус хурдаллаа.
Ц.Амарбаяр