Gilltown үржлийн ферм

Тэлмэн
2014 оны 4-р сарын 07 -нд

Мөнх ногоон адууны орноор хийсэн аян замын тэмдэглэлийн дараагийнх уншигч танаа хүрч байна. Энэ удаа та бүхэнд Gilltown үржлийн фермийг танилцуулахаар бэлтгэлээ. 1500 акре талбай бүхий  зургаан ферм нийлсэн өдгөөгийн Гиллтаун /Gilltown/ нь үндэсний өв соёл бүхий дархан цаазат газарт тооцогддог. Учир нь XII зууны үед энэ газар тухайн үеийн хамгийн том эдлэн газарт тооцогддог байсан бөгөөд  эзэмшигч нь ноён Dermot McMurrough гэгч байжээ. Харин XVI зууны үед энэхүү эдлэн Borrowes-ынхны мэдэлд шилжин очиж, ХХ зууныг хүртэл энэхүү гэр бүлийнхэн  амьдарч байсан хэмээдэг. Хэдэн зууны туршид гэр бүлийн эзэмшлийн эдлэн газар байсан Гиллтаун адуу үржүүлгийн ферм болох үндсийг  Captain RB Brassey анх тавьжээ. Харин өдгөөгийн эзэмшигч дөрөвдүгээр Ага Хан буюу Shah Karim Аl-Hussaini нь Исламын Низари Исмали хэмээх бүлийн 49 дэх үе залгамжлагч бөгөөд 1936 оны 12 дугаар сарын 13-нд Швейцарийн нийслэл Женева хотноо төржээ. Ага Хан энэхүү элдэнгээ 1960 онд АНУ-ын иргэнд худалдсан ч 1992 онд буцаан худалдан авсан байна. Тэрээр өдгөө Франц улсад амьдардаг бөгөөд тэндээ мөн адуу үржүүлгийн фермтэй аж. 2010 оны “Форбес” сэтгүүлд “Ага Хан нь дэлхийн хамгийн баян 10 эрхмийн нэг бөгөөд 800 сая долларын хөрөнгөтэй” хэмээн мэдээлж, Гиллтауны эзэмшигчийн  хөрөнгийг зарласан билээ.
Ирландын алдартай үржлийн фермүүдийн нэг  Гиллтауны өнөө цагийн өнгө төрх, нэрийн хуудас болсон олон хурдан азарганы нэг нь алдарт Sea the Stars юм. Өмнө нь өгүүлсэнчлэн Sea the Stars нь Күүлмоорийн бахархал алдарт Галилеотой эх нэгтэй, эцэг өөртэй  бөгөөд 2006 оны унага аж.  Дэлхийн том уралдаанууд болох Epsom Derby, Eclipse Stakes, 2000 Guineas болон Prix de I’Arc de Triomphe зэрэгт дараалан түрүүлсэн амжилтаараа өдгөө морь сонирхогчдын анхаарлыг татаад буй  энэ хурдан азарганы амжилтыг 1989 оноос хойш ямар ч адуу үзүүлээгүй байсан гэх юм билээ. Sea the Stars азарганы нийт уралдааны шагнал нь 4.4 сая фунт стерлинг болсон бөгөөд 2009 оны 10 дугаар сараас “зодог тайлж” үржлийн фермд иржээ. Түүний нэг удаагийн хээлтүүлэг нь 75000 фунт стерлингээр үнэлэгдэж байсан бөгөөд 2010 онд 140, 2013 онд 160, харин энэ жилийн тухайд 120 гүү хээлтүүлэх ёстой байгаа гэнэ. Энэ жилийн нэг удаагийн хээлтүүлгийн үнэ 85 мянган евро байгаа гэсэн шүү.
Бид Гиллтаунтай танилцах зуураа алдарт Sea the Stars болон өөр хоёр ч азаргыг ойроос харж, “шинжсэн” билээ.
А.Тэлмэн

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна