“МАКС”-ын бөхчүүд

Говь-Алтай аймгийн Баян-Уул сумын уугуул Дагвадоржийн Ганбаатар, Дагвадоржийн Цэрэнжигмэд хэмээх хоёр эрхмийг мэдэхгүй хүн ховорхон. Ёстой л бор зүрхээрээ бүхнийг босгосон ах дүүс эдүгээ Монголын худалдаа, хүнс, барилга гэх мэтчилэн олон салбарт манлайлж явна. Ажил үйл нь өнгөтэй өөдрөг яваа тэдний нэг сонирхол нь хурдан морь бөгөөд бахархууштай нь хоёул “Монгол улсын тод манлай уяач” цолтой. Өмнөх зуунд Өвөрхангай аймагт нэр алдраа дуурсгасан Замбал хэмээх уяач байсан гэдэг. Замбалын ногоон хэмээх алдартай хүлэг аймаг сумын олон түрүү хүртэж байсан тухай нутгийн ахмадууд өгүүлэх. Энд өгүүлж буй Замбал хэмээх уяачийн охиноос төрсөн хөвүүд нь Цэрэнжигмэд, Ганбаатар нар. Аргагүй л удам дагасан уяачид гэдэг нь эндээс харагдах болов уу. Максынхан аль ч наадамд одтой нааддаг. Мориор ч тэр, бөхөөр ч тэр. Бөхөөр гэхийн учир юун хэмээвээс тод манлай уяачид маань цөөнгүй бөхийг группийнхээ нэр дээр барилдуулж ивээн тэтгэдэг.
Ах дүү хоёрын ээж З.Цэрэн хэмээх ахайтан Өвөрхангай аймгийн Нарийнтээл сумын хүн. Арга байхгүй дархан аварга Дашдоржийн Цэрэнтогтохын нутгийн хүн. Тиймээс ч нутгийн аварга Д.Цэрэнтогтохын хүргэн хүү, ид залуу начин Д.Рагчааг группийнхээ бөх болгож өдийг хүртэл амжилт ололтын баярыг хуваасаар иржээ.
Дамбийн Рагчаа хэмээх энэ эрхэм 1997 оноос аймаг цэргийн цолтны барилдаанд дөмөг барилдаж нэрээ дуурсгаж эхэлсэн агаад энэ л үеэс Макс группийн бөх болсон байдаг. 2001 онд улсын начин цол хүртэж түүнээс эдүгээг хүртэл улсынхаа баяр наадамд нэгэнтээ үзүүрлэж, хоёронтоо долоо давж, нийтдээ долоон удаа шөвгөрчээ. Эдүгээ цагийн хүчтэнүүд дотор арал бяр, ноён нуруу жудаг ёсоор аргагүй ялгарах энэ бөх дөч хэвийсэн настай ч ид залуу хүчтэнүүдтэй хүч бярыг сорьж өнөө жилийн сар шинийн барилдаанд түрүүлсэн билээ. Харих болоогүйгээ харуулж харин ч төрийн наадмын түрүү үзүүрт үлдэх хэмжээний бөх гэдгээ баталсанд баярлах хүн олон байна. Хүчит гарди маань тун удахгүй тулгар төрийнхөө наадамд туг сүлдээ есөнтөө тойрох биз ээ.
Тод манлай уяачдын аавынх нь нутгийн Баттулгын Соронзонболд, Дугардоржийн Батбаяр нар Максийн бөхчүүд болсоор багагүй хугацаа өнгөрчээ. Зааны тухайд жил орчмын өмнөөс уг группийн бөх болсон агаад 2008 оны улсын баяр наадмаар у.ө.и.н М.Жамьянпүрэв, у.ав Г.Эрхэмбаяр, у.х А.Бямбажав, у.а Х.Мөнхбаатар, д.ав Г.Өсөхбаяр нарыг цувруулан орхиж “Монгол улсын заан” цолд хүрсэн билээ. Заал танхимын барилдаанд тогтмол амжилттай барилддаг, сийрэгхэн хийгүй барилдаантай, уран мэхтэй, мэхэндээ тэсрэлттэй барилдаантай бөх.
Дугардоржийн Батбаяр хэмээх энэ нэр Макстай холбогдоод бас ч багагүй удлаа. Зүүн баруунгүй хавирдаг, зүгээр зогсож байсан ч наадаг энэ бөх наадмын өм жаахан дутахаас бус зааланд бол мөн ч сайхан үздэг дээ. Саяхан л өөрийн компаний бөх Б.Соронзонболд заантай үлдэн түрүүлсэн дээ. Заан харцага цолд төвөггүй хүрчих арал бяр дүүрэн энэ бөхийг наадамчид жил бүр горьдон харсаар л байна.
Улсын начин Батмөнхийн Сангисүрэн аймгийн арслан байхдаа энэ группээр овоглосон. Сугадсан байхад хэнийг ч хаядаг Сангисүрэн начин нэг л өдөр төрийн наадмын засуулуудыг ханаруулах вий. Бэлтгэл нь жигдрээд ирэхэд ямар ч барилдаанд дайраад, даваад барилдчихна даа.
Мөн Макс группээр овоглон барилддаг нэгэн бөхийг өгүүлэхгүй байж болохгүй биз ээ. Байгууллага компаниуд улс аймгийн цолтой шилдэг бөхчүүдийг ивээн тэтгэдгээс биш өсвөрийн бөхийг ивээн тэтгэж байсан тохиолдол өмнө бараг үгүй болов уу. Тэгвэл Максийнхан Батжаргалын Лхагвадорж хэмээх хүүг ивээн тэтгэж барилдуулаад гурван жилийн нүүр үзэх гэж байна. Улсын их баяр наадмын өсвөр бөхийн барилдаанд хоёронтоо түрүүлээд буй Лхагвадорж хүү ах дүүсийн ээжийнх нь нутгийнх. Сар шинийн өсвөрт түрүүлж Максийн бөхчүүдийнхээ салхийг сайхан хагалсан энэ хүүд олон хүн найдвар тавьж байна.
Мөн Макс группын охин компаниудад а.н Б.Мөнхбат, с.з Б.Бямбадорж,с.з Ч.Эрдэнэбаяр, Б.Оюун-Эрдэнэ, с.н М.Мөнхбаатар нарын бөхчүүд ажиллаж байна.

Олон сайхан бөхийг ивээн тэтгэж бүхий л бололцоогоор хангаж буй "Макс" группын хамт олны хишиг буян дэлгэрч, уясан бүхэн нь түрүү манлай болж, унасан хүүхэд нь баярын жавхааг нэмж, бөхчүүд нь цол нэмж, бүр цаашлаад төрийн наадмыг манлайлахын ерөөл өргөе.

МУИС-ийн оюутан Т.Түмэндэмбэрэл