С.Лхүндэврэгзэн: Улсын шилдэг холбоогоор шалгарсандаа маш их баяртай байгаа

Булган аймгийн Дашинчилэн сумын "Нутгийн хурд" МСУХ үүсгэн байгуулагдаад зургаа дахь жилтэйгээ золгож байна. XVII жарны Ялгуусан хэмээх модон морин жилийн босгон дээр тус уяачдын холбоо улсын шилдэг салбар холбоогоор шалгарч, ярилцлагын эзэн болох холбооны тэргүүн маань "Манлай хүлэгч" цолны эзэн болсон билээ. Ингээд "Нутгийн хурд" МСУХ-ны тэргүүн С.Лхүндэврэгзэнтэй ярилцсанаа хүргэж байна.

-Улсын хэмжээний шилдэг салбар холбоодын нэгээр шалгарлаа.
-Баярлалаа. “Тод магнай”-н хамт олондоо. Миний бие 2007 оноос эхлэн “Нутгийн хурд” МСУХ-ныхоо тэргүүнээр сонгогдон ажиллаж байна. Өнгөрсөн хугацаанд манай холбоо аймгийнхаа хоёр удаагийн, улсын нэг удаагийн шилдэг салбараа шалгарсанд бид бүхэн баяртай байдаг. Улсын хэмжээний шилдэг салбар холбоогоор шалгарахад дэлхийн дээд амжилтанд бүртгүүлэх уралдаан ихээхэн нөлөөлсөн. Энэхүү уралдаанд манай сумын уяачид идэвхи зүтгэл гаргаж, 80 гаруй морьтон оролцсон. Мөн манай сумын Батмөнхийн Буянбаатарын /аймгийн Алдарт уяач/ хээр морь бүсдээ айргийн дөрөвт давхиж өндөр амжилт үзүүлсэн.
-Өнгөрсөн хугацаанд хоёр ч удаа шилдгээр шалгарч байсан гэлээ. Тэр нь хэд хэдэн онд вэ?
-2009, 2011 онд. Манай холбоо чинь 2007 онд үүсгэн байгуулагдсан шүү дээ.
-2007 онд оо, нэлээд хожуу байх нь ээ?
-Урьд нь холбоо нэртэй байсан ч ямар нэг үйл ажиллагаа явуулж байгаагүй. Тиймээс манай сумын хэсэг залуус ярилцаж байгаад “Нутгийн хурд” холбоогоо үүсгэн байгуулж, хаврын уралдааныг зохион байгуулж байлаа. Тэр үед манай сумын уугуул, “Зээст” компанийн захирал Зоригоо, Жавзмаа даргын хүү Ганболд, UFC компанийн захирал Амартүвшин нарын залуус дэмжлэг үзүүлж, хаврын уралдаанаа зохион байгуулж байлаа. Манай холбоо тэргүүн, нарийн бичгийн дарга, 11 тэргүүлэгчтэй.
-“Нутгийн хурд” хичнээн хүний гишүүчлэлтэй вэ?
-50 гаруй гишүүнтэй. Бүгдэд нь энгэрийн тэмдэг, үнэмлэх олгосон.
-2009 онд анх аймгийн шилдэг холбоогоор шалгарч байсан гэсэн. Үхэр жилд та бүхэн юу хийж бүтээсэн байсан бэ?
-Бид аймгийнхаа уяачдын холбоотой нягт хамтран ажиллаж, бодлого шийдвэрийг нь орон нутагтаа хэрэгжүүлдэг. Тэр үзүүлэлтээрээ үхэр жилийн аймгийн шилдэг салбар холбоогоор шалгарч байсан юм. Бид холбоогоо үүсгэн байгуулаад сумынхаа адууны чанарыг сайжруулах тал дээр анхаарч ажиллахаа амлаж, тэр хүрээндээ тэргүүлэгчид Хэнтий, Сүхбаатар зэрэг зүүн аймгаас хурдан адуу авчирч, түүнийгээ уяж сойхын зэрэгцээ нутгийн адууныхаа цусыг сэлбэж байна. Мөн уралдаан сунгаанаа ямар нэг будлиан маргаангүй эмх замбараатай зохион байгуулж чаддаг болсон. Сая 2013 онд аймгийн уяачдын холбооноос гарааны төхөөрөмжөөр шагнаж, уралдаан зохион байгуулахад бүр ч хялбар болсон.
-2014 онд сумын тань 90 жилийн ой тохиож буй. Бэлтгэл хэр базааж байна?
-Ойн бэлтгэл ажлыг бараг жилийн өмнөөс эхэлсэн. Манай холбооны зүгээс морин уралдаанаа сайн зохион байгуулахын зэрэгцээ уяачдынхаа амжилтыг ахиулж, нутгийн дэвжээнээ сайхан наадах үүргийг хүлээж байгаа. Уяачдаа морь малаа сайтар тэжээж уяа сойлгоо тааруул гэсэн үүргийг эртнээс өгсөн. Манай сумын уралдааны зам жаахан тааруу. Түүнийгээ сумын захиргаатай нийлж засахаар бэлтгэж байна.
-Төрийнхөө ордонд хоёронтаа орж, шилдэг холбооноос гадна “Манлай хүлэгч” цол хүртсэн. Мориор дамжсан үндэсний өв соёлыг хөгжүүлэх үйлсэд хичнээн жил зүтгэж байгаа вэ?
-Хөдөө өссөн малчны хүүхэд. Багаасаа адуу малтай ойр байж, хурдан морь унадаг байлаа. Манай аав морь сайн уядаг хүн байдаг юм. Одоо 70 гарсан хөгшин бий. Залуудаа Хэнтий аймгийн Галшар сумын гаралтай халзан азарга авч, тэр нь их хурдлан Сандагийн халзан хэмээн алдаршсан. Миний төрсөн дүү Болд гээд залуу бас морь уяна. Сумын Алдарт уяач цолтой. Сүхбаатар аймгийн Асгат сумаас хурд авчран нутагтаа дэлгэрүүлж байгаа. Ер нь манайхан цөмөөрөө морины төлөө сэтгэлтэй хүмүүс.
-Тэргүүн морь уях уу?
-Аавынхаа уясан морьдыг унадаг байсан бол сүүлийн үед өөрөө уяж байна. Уяачийнхаа хувьд шальтай амжилт гаргаагүй ээ. Хүүхэд, морь мэнд сайхан наадаад л явдаг юм.
-Ярилцсанд баярлалаа. Морин жил та бүхэнд аз ивээлээ хайрлах болтугай.
-Баярлалаа. Ингээд “Тод магнай”сэтгүүлээрээ дамжуулан нийт Дашинчилэнчүүддээ ирж буй модон морин жилдээ хийсэн бүтээсэн ажил нь амжилттай сайхан байхыг хүсэн ерөөж, уясан морь болгон нь хурдан байж, унасан хүүхэд нь сэргэлэн цовоо, ард түмэн нь аз хийморьтой байхыг бэлгэдье.