Нарийнтээл сумын аварга шалгаруулах барилдаан боллоо

Монгол улсын хөдөлмөрийн баатар, гавьяат тамирчин, дархан аварга Дашдоржийн Цэрэнтогтох, Монгол улсын уран барилдаант улам нэмэх харцага Чогжинмөнсөлийн Даваадорж, Монгол улсын начин Доржжанцангийн Батмөнх нарын унаган нутаг Өвөрхангай аймгийн Нарийнтээл сумын энэ оны аварга шалгаруулах барилдаан боллоо.
Барилдааныг төрөлх нутгийнхаа наадамд 1971 онд түрүүлж асан Дамбадаржаагийн Гочоо зааны хүү, Өвөрхангай аймгийн ИТХ-ын тэргүүлэгчдийн дарга Ганболд уламжлал ёсоор ивээн тэтгэж явууллаа.
Барилдаанд аймгийн начин П.Зоригсайхан, Б.Ганхуяг, сумын заан А.Анхбаатар, Н.Загархорол, Н.Загарзүсэм нараар манлайлуулсан хүчит 23 бөх зодоглож тойргийн журмаар барилдаж аваргаа тодруулав.
Барилдааны дүн гарахад аймгийн начин Баяртогтохын Ганхуяг дагуулж мушгих, хөмрөх, хутгах мэхээ даалгасаар 22 барилдаж унаагүй 22 даваа авснаар түрүүлсэн бол сумын залуу заан Найгалсүрэнгийн Загархорол гар таллаж ард гарах, хонгодож дайрах, харцагадаж шигшиж өргөх мэхээр гол өрсөлдөгчдөө өвдөглүүлж 21 даваагаар үзүүр булаав. Аймгийн ахмад начин Пүрэвийн Зоригсайхан дагуулж мушгих, давуулж гуядах, хавсрах дархан мэхүүдээ даацтай хийсээр 20 даваагаар гутгаар байр эзэлсэн бол сумын заан Амаржаргалын Анхбаатар тонгорох, зүүн хөлд орж дэрлэж дарах мэхээрээ 19 даваа авч дөтгөөр байр, сумын заан Найгалсүрэнгийн Загарзүсэм суйлах, харваж тахимдах мэхүүдээр 18 давж тавдугаар байр эзлэв.
Мөн сумын заан Ц.Содномринчингийн ач хүү, сумын начин С.Шагдарсүрэнгийн хүү, залуу бөх Ш.Бямбадорж дэгээдэж эргэх мэхээ даваа бүрт даалган хийсээр 16 даваагаар зургадугаар байр, залуу бөх Лхагвадоржийн Ариунболд хонгодох, зайлах мэхээ зоримог хийж 15 давж долдугаар байр, сумын заан Б.Бямбадоржийн дүү, улсын шонхор, сумын заан Б.Лхагвадоржийн ах, залуу бөх Батжаргалын Пүрэвдорж хонгодох мэхээрээ цөөнгүй даваа авч наймдугаар байр, залуу бөх Болдын Баярсүрэн үлдэцтэй барилдаан, уран мэхээр шуугиулсаар есдүгээр байр тус тус шалгарав.
ЕБС-ийн 9 дүгээр ангийн сурагч Чимэддоржийн Мөнхтайван барилдсан бөхчүүдээс насаар ч, биеэр ч хамгийн бага нь боловч хурдан шуурхай барилдаан, хурц эрэмгий мэхээр үзэгчдийг шуугиулж 11 даваа авч аравдугаар байрт шалгарч мөн “Уран барилдааны шагнал” хүртлээ. Уран барилдааны шагналыг сумын заан А.Отгонбаяр ивээн тэтгэв.
Мөн сумын заан Д.Дагивдоржийн ач хүү, залуу бөх Ц.Мөнхдоржийн зүүн хөмрөх, дагуулж тохох, залуу бөх М.Мөнхбаатарын өмсөх, суйлах, залуу бөх Ө.Пүрэвдоржийн сугадаж хавирах, мордох, а.а Д.Болдбаатарын зээ дүү, залуу бөх О.Дэмчигдоржийн хөлд орох, гар таллаж тахимдах мэхүүд тун ч даацтай болж байв.
Оны аварга шалгаруулах барилдааны хаалтын барилдааныг тус барилдааны үеэр алтан гадас одонгоор энгэрээ мялаасан, сумын ҮБХ-ы тэргүүн Цэрэнжигмэдийн Санжид, а.н Б.Ганхуяг, с.з Б.Мөнх-Өрнөх нарын аав, мянгат малчин Ц.Баяртогтох нарын ах дүүс ивээн тэтгэлээ.
Барилдаанд а.н П.Зоригсайхан, а.н Б.Ганхуяг, с.з А.Отгонбаяр, с.з А.Анхбаатар нараар манлайлуулсан хүчит 32 бөх зодоглон барилдав.
Бөхийн барилдааны хоёрын даваанд з.б Д.Наранбаатар з.б Ш.Бямбадоржийг дунгуйлдаж татаад, з.б Л.Ариунболд з.б Ж.Долгорсүрэнг тахимдаад тус тус давав.
Гурвын даваанд а.н П.Зоригсайхан з.б Л.Ариунболдыг этэж дайраад, а.н Б.Ганхуяг з.б Д.Наранбаатарыг тонгороод тус тус давлаа. С.з А.Отгонбаяр гурван залуу заанаас Н.Загарзүсэмийг амлаж барьц сонгож өргөсөн боловч дагуулж мушгиад залуу заан давав. Тунасан хоёрын барилдаан удаж төдсөнгүй. С.з Н.Загархорол таллаж татаад ард нь гараад давлаа. Тойргийн барилдаанд залуу заан мөн энэ мэхээрээ давсан юм.
Дөрвийн даваанд а.н П.Зоригсайхан с.з Н.Загарзүсэмд барилдалгүй элэг бүсээ тайлж өгсөн бол а.н Б.Ганхуяг с.з Н.Загархоролыг тахимдаад давлаа.
Үзүүрт с.з Н.Загарзүсэм а.н Б.Ганхуягийг хөлд нь орж дэрлээд давснаар түрүү бөхөөр тодров.
Оноог хоёрын даваанаас үзнэ үү.
Хоёрын даваа
1. П.Зоригсайхан а.н – М.Мөнхбаатар з.б
2. Б.Ганхуяг а.н – Ч.Өлзийбадрах з.б
3. А.Отгонбаяр с.з – А.Пүрэвбат з.б
4. А.Анхбаатар с.з – Б.Баярсүрэн з.б
5. Н.Загархорол с.з – Б.Пүрэвдорж з.б
6. Н.Загарзүсэм с.з – Б.Даваадорж з.б
7. Д.Наранбаатар з.б – Ш.Бямбадорж з.б
8. Ж.Долгорсүрэн з.б – Л.Ариунболд з.б
Гурвын даваа
1. П.Зоригсайхан а.н - Л.Ариунболд з.б
2. Б.Ганхуяг а.н - Д.Наранбаатар з.б
3. А.Отгонбаяр с.з - Н.Загарзүсэм с.з
4. А.Анхбаатар с.з - Н.Загархорол с.з
Дөрвийн даваа
1. П.Зоригсайхан а.н – Н.Загарзүсэм с.з
2. Б.Ганхуяг а.н – Н.Загархорол с.з
Тавын даваа
1. Б.Ганхуяг а.н – Н.Загарзүсэм с.з