Манлай уяач Д.Хишигжаргал: Гурванбулаг сумаас нэг дор хоёр Манлай уяач төрлөө

-Юуны өмнө морин жилийн босгон дээр МУ-ын Манлай уяач хэмээх эрхэм цолны эзэн болсон танд баяр хүргэе. Шарга үрээ  өнөө жил одтой сайхан наадан, төрийн наадмын түрүү хүлгээр тодорсон?
- Юуны өмнө бүх Монголчуудадаа тэр дундаа Булганчуудадаа сар шинийн баярын мэнд хүргэе. Энэ баярт мөчид Онон багшдаа баярлаж явдгаа илэрхийлмээр байна. Шарга үрээ маань өнөө жил төрийнхөө их баяр наадамд түрүүлж, Манлай уяач цолны болзлыг хангаж өгсөн. Шарга үрээ  Онон багшийн маань унаган адуу гэдгийг морь сонирхогчид андахгүй бизээ.
-Хичнээн жил морины сүүл боож Манлай уяач цолонд хүрэв?
-19 жил болж байна. Онон багш дээрээ очсоноос хойш 12 жил болсон байна. Энэ бүхэн Онон багшийн маань ач гавьяа юм даа.   Өнгөрсөн хугацаанд улс бүсийн чанартай наадмаас хоёр түрүү, 13 айраг хүртэн МУ-ын Манлай уяач цолыг хүртлээ.
-Тэгэхдээ цөөн адууны амжилтаар гэсэн онцлог бий?
-Тиймээ, би морь уясан цагаасаа хойш гурван адуугаар наадан энэхүү амжилтыг үзүүлсэн.
- Булган нутгаас хоёр Манлай уяач нэг дор төрсөн нь бас их ховорхон тохиох аз завшаан байх?
-Булган аймгаас тэр дундаа Гурванбулаг сумаас хоёр Манлай уяач төрлөө. 2013 он могой жилд Булганчууд маань одтой сайхан наадан, Гиннесийн амжилтанд бүртгүүлэх  түмэн морьтны жагсаал болон, 4249 морины уралдаанд хамгийн өргөн бүрэлдэхүүнтэйгээр оролцож нутаг усныхаа нэрийг дуурсгасан.
-Морин жилийн уралдаанууд тун удахгүй эхлэх гэж байна. Манлайн морьд хэр хөнгөрч байна?
-Уламжлал болоод байсан хаврын бүсийн уралдаанууд энэ жил болох эсэх нь тодорхойгүй байна. Уг нь зургаан насны 6-7 адуу хөнгөрүүлсэн байсан. Шарга үрээ маань энэ жил соёолон. Сунгаануудад гайгүй хурдан л байсан. Уралдаж чадах нь уу эргэлзээтэй л байна.
- Ярилцсанд баярлалаа.Морин жилийн уралдаануудад тань амжилт хүсье.
А.Тэлмэн