Говь-Алтай аймгийн МСУХ шилдгүүдээ тодрууллаа

Өнгөрч буй могой жил Алтай нутгаар овоглосон  уяачдын  хувьд улс,  бүс,  "Их хурд",  Геннисийн  гэх мэт томоохон  уралдаануудад түрүү  айраг олныг  хүртэж төрөлх нутгийн уул ус, ахан  дүүсээ баярлуулсан сайхан жил болж өнгөрч байна. Зөвхөн нутагтаа  байгаа  уяачдын  хувьд   Завхан  аймгийн  90  жилийн  ой,  баруун  бүсийн хурдан морины уралдаанаас хоёр түрүү,найман айраг авсан нь Алтай нутгийн уяачдын эрдэм, морьдын хурдыг илтгэж байгаа юм. Эдгээр уяачид болон хурдан морьдын төлөө зүтгэл гаргаж буй хүмүүс, унаач хүүхэд, шандаст хурдан хүлгүүдээсээ могой жилийн шилдгүүдээ тодрууллаа. Шилдэг уяачаар баруун  бүсийн  хурдан  морины  уралдаанд  азарга,  шүдлэн айрагдуулж, аймгийн баяр наадмаас нэг айраг авсан амжилтаар Тайшир сумын уяач Н.Чилхаасүрэн шалгарсан бол шилдгийн шилдэг унаачаар аймаг болон  аймгийн  бүсийн  наадмаас найман айраг түрүү авсан амжилтаар Есөнбулаг сумын II сургуулийн сурагч Батболдын Давааням, шилдэг унаачаар Хөхморьт сумын 9 жилийн дунд сургуулийн сурагч Энхбаатарын Төрболд, Есөнбулаг сумын III сургуулийн сурагч Нямзоригийн Гантогтох, Баян-Уул сумын 12 жилийн дунд сургуулийн сурагч Энхбатын Сүхбат, Есөнбулаг сумын II сургуулийн сурагч Доржийн Цэгмид нар, морины  шилдэг  зүтгэлтнээр аймгийн  МСУХ-ны  тэргүүлэгч  Дүгэрийн Амартүвшин морин спортыг дэмжигч шилдэг удирдах ажилтнаар Н.Дагвадорж шилдэг галаар Т.Ганзориг тэргүүнтэй “Морьт-Галуут” гал, шилдэг  салбар  холбоогоор Р.Ганхуяг  тэргүүнтэй  “Дарив  хээр” уяачдын холбоо шилдэг азаргаар баруун бүсийн уралдаанд айргийн дөрөв, аймгийн наадамд аман хүзүүдсэн амжилтаар Халиун сумын харъяат, аймгийн Алдарт уяач  Н.Загддоржийн хүрэн халзан, Шилдэг их насны мориор аймгийн наадамд аман хүзүүдэж, аймгийн хаврын бүсийн хоёр уралдаанд  түрүүлсэн  амжилтаар  Шарга  сумын  харъяат аймгийн Алдарт уяач  Р.Лхагвадоржийн халтар тус тус шалгарлаа. Шилдгээр шалгарсан нийт уяачид, унаачдадаа гарч буй морин жилийн сар шинийн мэндийг дэвшүүлж сайн сайхныг хүсэн ерөөе.

"Говь-Алтай"аймгийн МСУХ-ны тэргүүн Д.Гомбожав