Хурдны “Дого” гэж байдаг юм

      Нэгэн зун Дорноговийн Даланжаргалан сумын наадамд уяач “халзан” Гүр хурдан хар азаргаа уясаар хүрч очжээ. Хар азарга эвлэсэн ч гэж жигтэйхэн. Наадмын өглөө хүү нь хар азаргаа хөтөлж  ирснээ :
---Дөө,,,,,,,,  хар азарга маань хойшоо доголоод адуу өшиглөчихсөн юм шиг байна гэж иржээ. Гүр дэргэд нь очоод  хөтлөөд үзтэл хойшоогоо больчихоод урагшаа доголоод байна гэнэ. Хойшоо, урагшаа ээлжилж доголоод ганц гайгүй адуу ингээд хөлгүй болдог юм байхдаа гэж гайхаад харамсаад  байж байтал нэг өвгөн ирж харж ажиглаж байснаа
-За хүү минь чиний хар азарганы чинь хурдны “дого”  ирчихэж мордуулаад явуул.Саад тотгор л битгий дайраасай, ганцаараа л ирнэ дээ хүү минь гэж гэнэ.      
   Гүр зориг орж хүүхдээ мордуулаад явахыг нь харахад гайгүй ч юм шиг байхаар нь явуулчихжээ.Яадаг бол гэж бодсоор тэсч ядаж байтал хар азарга ганцаараа хол түрүүлээд ирсэн байна.
Дараа нь Хар айргийн наадам дамжаад хар азаргаа аваад очжээ. Наадмын өглөө мөн л хар азарга доголж байна гэнэ. Хэд хоногийн өмнө түрүүлсэн хар азаргыг хүн бүр л ирж харна. Харсан хүмүүс халзан Гүрийн хурдан хар азарга  адуунд өшиглүүлээд доголчихож уралдах ч өнгөрчээ гэсэн яриа дорхноо таржээ. Мань Гүр дотроо инээгээд л мэдэхгүй царайлаад  хар азаргаа мордуулаад л явуулж.  Хар азарга ч мөн л ганцаараа тасархай ирсэн байна. Үүүнээс хойш уяач халзан Гүр “хурдны дого” гэж байдаг юм шүү? Надад ганц удаа л таарсан даа, мэдэж байхад илүүдэхгүй гэж ярьдаг байжээ.