Хурдан морь унаач М.Анхбаатар:Унасан хүлгээ цоллуулж зогсох гоё

-Хэдэн настайгаасаа морь унаж байна вэ?
-Миний аав морь уядаг. Тийм болохоор анх ааваараа заалгаж морь унаж сурсан. Номхон морь унаж сурсан болохоор нэг их аймаар санагдаж байгаагүй ээ. Гэхдээ яг уралдааны замд бол мэдээж бодож байснаас өөр л байна шүү дээ. Зургаан настайдаа Их-Уул сумынхаа баяр наадамд  шарга соёолонгоо унаж уралдсан нь миний анхны уралдаан байгаа юм. Тэгэхэд шарга соёолно 16,17 хавьцаа л орсон санагдаж байна. Одоо би 9 настай. 
-Тэгвэл анхны айргаа хэзээ хүртэж байсан бэ?
-Ховолжийн баярт цавьдар морь унаж айргийн дөрвөөр хурдлуулсан. Энэ миний анхны айраг байгаа юм. Үнэхээр гоё санагдаж байсан. Өмнө нь наадамд уралдаж байгаа хүүхдүүдийг хараад л зогсдог байсан бол халуун цэгт нь өөрөө орохоор бас гоё  юм билээ. Унасан хүлгээ цоллуулж зогсох бүүр гоё гээч.
-Хурдан морь унах гоё гэж хүүхэд бүр л хариулдаг. Мэдээж бас хэцүү зүйл байна биз дээ.
-Байлгүй яахав. Нэг бус удаа ойчиж үзсэн. Гэхдээ азаар гар хөлөө ч шалбалаагүй өнгөрсөн.
-Аймагтаа ирж уралдаж байна уу?
-Аймагт энэ жилээс ирж уралдаж байгаа. Аймгийн өвлийн уралдаанд соёолон унаж, 30-н хэдээр давхиусан. Харин зургаадугаар сарын 1-нд болсон “Дэлтэй цэнхэрийн хурд 2013” доод гурван насны уралдаанд 60 гаргаад ирлээ.
-Ярилцсанд баярлалаа. Унасан болгон нь айраг түрүүнд хурдалж байх болтугай.