Сумын Алдарт уяач Т.Болдбаатар:Хүрэн азаргаараа могой жил сайхан наадсан

-Улиран өнгөрч байгаа усан могой жил Болдбаатар уяачийн хувьд од хиймориор дүүрэн байсан. Амжилтынхаа цувааг манай уншигчдад танилцуулаач?
-Тиймээ. Өнгөрөгч могой жил миний хувьд амжилт арвинтай сайхан жил байлаа. Хавар Өвөрхангай аймгийн Бүрд суманд болсон аймгийн зүүн бүсийн уралдаанд их насны хүрэн морь түрүүлж,  Архангай аймгийн 90 жилийн ой, хангайн бүсийн наадамд хүрэн азарга гуравлан, Архангай аймгийн Хотонт сумын 90 жилийн ойд шарга хязаалан таваар давхиулсан. Мөн Өвөрхангай аймгийн морины их шүтээний даншиг наадамд хүрэн азарга дөрвөөр давхисан.
-Засгийн газрын тогтоолт бүсийн наадамд айрагдсан хүрэн азарга хаанахын адуу вэ?
-Би хүрэн азаргаа 2013 онд найзаасаа авсан юм. Гарал нь Сүхбаатар аймгийн Халзан сумын адуу гэсэн. Бүр тодруулбал Мөнхтөр гэж хүний адуу гэнэ лээ. Надад дамжиж ирсэн. Надад ирэхээсээ өмнө бага саг наадмуудад айрагдаж байсан гэдэг. Харин хүрэн морио Дорнод аймгийн Матад сумын харьяат Ганбаа гэдэг хүнээс 12 настайд нь авч түүнээс хойш сумын наадамд дөрөв тав түрүүлгээд, өнгөрсөн хавар аймгийн зүүн бүсийн наадамд түрүүлгэж байгаа нь тэр юм.
-2013 оны амжилтаараа аймгийн Алдарт уяачийн болзол хангаад байгаа гэсэн. Ер нь морь уясан цагаасаа хойш хичнээн айраг түрүү аваад байгаа вэ?
-Аймаг, аймгийн чанартай наадмуудаас 13 айраг, түрүүтэй. Харин сум, сумын чанартай наадмуудаас 40-өөд айраг, түрүү авсан байх.
-Хурдан морь уях болсоор хэдэн жил болж байгаа вэ?
-2003 оноос хойш гэхээр 10 гаруй жил болж байна. Нэг жил сумын наадмын таван түрүү, зургаан айргийг авч л  байлаа. Хархорин сумын 50 жилийн ойд их морь түрүүлгэж байлаа. Мөн сумынхаа 80 жилийн ойд  хонгор морь түрүүлгэсэн. Мөн Архангай аймгийн Суварга хайрханы төрийн тахилга наадамд даага гурваар давхиулж байсан юм байна.
-Өвөрхангайнхныг адууныхаа чанарыг сайжруулахад ихээхэн анхаарч байгаа гэлцдэг. Танай сумынхан энэ тал дээр хэр анхаарч байна?
-Авч байнаа. Сүхбаатар, Дорнод зэрэг хурдтай аймгуудаас олон адуу авчирсан. Авчирсан адуунуудаа өөрөө уяхаас гадна найз нөхдөдөө өгч байна. Хамгийн анх Хэнтий аймгийн Баянхутаг сумаас нэг адуу авчирч байлаа. Түүний дараа Сүхбаатар аймгийн Халзан, Асгат, Дорнод аймгийн Матад сумдаас адуу авчирч нутгийн адуутай нийлүүлсэн. Бага адуунууд түрүүчээсээ уягдаж л байна.Манай сум чинь Өвөрхангайнхаа хамгийн их цас унадаг газар. Мөн чоно нохой ихтэй. Гэсэн хэдий ч уяачид маань дор бүрнээ адуугаа сайжруулахаар зүтгэж байна.
-Морь жилийн босгон дээр шинэ цолны болзол хангаад байгаа хийморилог уяачийн бахдалт наадмын дурсамжаар яриагаа өндөрлөе гэж бодож байна?
-Мэдээж хүрэн азарга айрагдсан хангайн бүсийн наадам хамгийн сайхан нь байсан. Түүнээс гадна Архангай аймгийн Суварга хайрханд даага гуравлуулахад бас их баярласан. Яагаад гэхээр дандаа улсын том том цолтой уяачид ирчихсэн тэр наадамд Өвөрхангай аймгаас миний л даага айрагдаж байлаа. Тэр том бэлгэшээлт наадамд нутаг ус, сум орныхоо нэрийг гаргасандаа маш их баярлаж билээ.
-Ийм сайхан дурсамжит наадмууд олон байх болтугай. Ирж буй морь жилд уясан нь хурдан, унасан нь золбоолог байх болтугай.