Унаач Б.Эрдэнэчимэг: Ээж маань багадаа унаач охин явсан болохоор миний сайн зөвлөх байгаа юм

Хөвсгөл аймгийн Мөрөн сумын хурдан морины унаач охин Б.Эрдэнэчимэгтэй хөөрөлдсөнөө уншигч танаа хүргэж байна.

-Хэдэн наснаасаа хурдан морь унаж байгаа вэ?
-Зарим хүүхдүүдийн хажууд би жоохон хожуу унаач болсон. 10 настайгаасаа морь унаад одоо гурван жил болж байна.  Сүүлд зургаадугаар сарын 1-нд болсон “Дэлтэй цэнхэрийн хурд 2013” доод гурван насны морьдын уралдаанд  Нямбаатар ахынхаа морийг унаж 60,70 хавьцаа ирлээ.
-Энэ гурван жилийн хугацаанд ямар ямар амжилт үзүүлж байв?
-Мөрөн сум болон Улааны овоод их насны морь унаж хурдлуулж байлаа. Нэгэнд нь зургаагаар, нөгөөд нь 60-ын дотор л давхисан. Цаашид амжилтаа ахиулна даа.
-Хурдан морь унахад хамгийн гоё нь юу юм бэ?
-Үгээр хэлэхэд хэцүү санагдаж байна. Нэг тийм гоё мэдрэмж төрдөг юмаа. Найз нарын маань зарим нь бас морь унаж хурдлуулдаг. Үеийнхээ хүүхдүүдтэй салхи татуулан барианы зүг хурдалж байх сайхан ш дээ. Гэхдээ манайх Мөрөнгийн төв дээр амьдардаг айл болохоор аминдаа адуу байхгүй ээ. Хөдөө  цөөн тооны хонь, ямаа бий.
-Ингэхэд чи яагаад унаач болсон юм бэ. Аав тань морь уядаг юм уу?
-Манай аав морь уяж байгаагүй  ээ. Бүүр хүүхэд байхдаа ч хурдан морь унаж байгаагүй гэдэг юм байна лээ. Харин ээж маань багадаа морь унадаг байсан гэж ярьдаг. Тиймдээ ч  миний сайн зөвлөх байгаа юм. Уралдааны замд гарахын өмнө аминчлан бас зөвлөнө гээч. Манайх таван хүүхэдтэй. Би дээрээ нэг ах, хоёр эгч, нэг дүүтэй. Биднээс би л хурдан морь унадаг юм.
-Хэддүгээр ангид сурдаг вэ?
-Долдугаар ангид сурдаг. Математик, монгол хэл, биеийн тамирын хичээлдээ их дуртай.
-Дүүгийнхээ хичээл сурлагад амжилт хүсье.