Буриад сурын багийн харваа болно

Налайх дүүргийн ЗДТГ, урианхай, буриад сурын улсын мэргэн, спортын мастер Ш.Батхуяг,  урианхай сурын улсын мэргэн, спортын мастер Ч.Одонхүү, урианхай сурын улсын мэргэн, спортын мастер Ч.Одонгэрэл нар хамтран энэ сарын 18-нд Буриад сурын багийн харвааг явуулах гэж байна. Налайх дүүргийн “Аврах” спорт зааланд болох зар тараагаад байгаа энэ харваа:
1. Багууд сугалаа сугалж тоглох дараалал, өрсөлдөх багаа сонгоно
2. Багийн гишүүн бүр харвах дарааллаа сугална
3. Оноолт таарсан 2 багийн гишүүд харгалзан таарсан сугалааны дарааллаар харвана.
4. Оноо тэнцсэн гишүүд болон баг “ товх” харвана
5. Харвах зай 22 м гэсэн журмаар явагдах юм байна.
                  Энд нэмж сонирхуулахад Буриад сурыг 40 буюу 30 метр нум, 30 буюу 20 метр нум гэсэн хоёр зайнаас харвадаг. Сураа өргөж харвадаг талбайг зураахай гэнэ. Зураахай нь 4х4метрийн хэмжээтэй байх бөгөөд сурыг сайн шахаж өгдгөөрөө онцлогтой. Сур өрөх шугамаас хоёр тийш хоёр метрийн зайд газрыг зураахай талдаа эгц эрмэгтэй, зураахайн гадна талаас налуугаар дөрвөн метр урттай, 15 см орчим гүн ухах бөгөөд энэ ухсан газрыг харвах талынхыг “урт ганга”, нөгөө талынхыг нь “арын ганга” гэдэг. Буриад сурын багийн харваанд зураахайн хоёр талаас “урд эхэн”, “хойд эхэн” гарч харвадаг учраас нэг зураахайд 80х4метрээс багагүй тэгш гадаргуутай, хайрга чулуугүй талбай шаардагддаг байна. Буриад харваагаар Дорнодчууд хамгийн олон амжилтыг гаргасан байдаг ажээ.

П.Ундраа