“Зуун мэргэн”-чүүд Тусгаар тогтнолын баярыг тэмдэглэв

МУ-ын спортын мастер Л.Сүхбат, МУ-ын Гоц мэргэн Х.Оюунчимэг нарын тэргүүлдэг “Зуун мэргэн” холбоо өнгөрсөн 2013 оныг амжилт ололтоор дүүрэн үдсэн билээ. Үүнийг 2013 оны Монголын үндэсний сурын холбооны шилдгүүдийн жагсаалтаас төвөггүй харж болно. Оны шилдэг эмэгтэй харваачдыг Хэнтий аймгийн Дадал сумын уугуул, “Зуун мэргэн” холбооны харваач МУ-ын Гоц мэргэн Х.Оюунчимэг 180 оноогоор тэргүүлсэн бол хүүхдүүдээс оны манлай эрэгтэй харваач Т.Даваацэрэн, манлай эмэгтэй харваач МУ-ын спортын мастер Б.Отгонжаргал нар шалгарсан. Мөн оны шилдэг дасгалжуулагчаар “Зуун мэргэн” холбооны харваач Л.Сүхбат шалгарч, тус холбоо шилдэг ивээн тэтгэгч байгууллага болсон амжилтыг нь дурдах байна. Ийнхүү 2013 онд одтой наадсан “Зуун мэргэн”-чүүд Монгол улсын тусгаар тогтнолын баярыг тохиолдуулан өвлийн харвааг Төв аймагт явууллаа. 50, 60,70 метрийн байнаас харвасан энэхүү тэмцээнд 30 орчим харваачид хүйтнийг ажралгүй эр зориг, цэц мэргээ сорьж МУ-ын мэргэн Баярсайхан тэргүүлжээ. Харин дэд мастер Г.Баянмөнх, мастер Жамбалдорж нар товх харваж, Баянмөнх хоёрдугаар байранд орж, Жамбалдорж удаалан өргөмжлөл, мөнгөн шагналын эзэд болов. Ямартаа ч шинэ оны босгон дээр ийнхүү амжилттай наадсан харваачид маань “гараа сайн бол бариа сайн” хэмээн 2014 оныг сэтгэл дэврүүн угтан авлаа.

П.Ундраа