Уран барилдаант начин түрүүллээ

Засагт Ханы Завхан бөхийн дэвжээнээс сар бүр зохион байгуулдаг үндэсний бөхийн барилдаан өчигдөр буюу 2013 оны 12 дугаар сарын 26-ий өдөр хуучнаар Хоршоолол нийгэмлэг буюу Чингэлтэй дүүргийн спортын газар боллоо.
Барилдаанд Монгол улсын өсөх идэр начин Ш.Уламбаяр, Ж.Отгонбаяр, Ж.Оргил, Ш.Жаргалсайхан, улсын начин Л.Нямсүрэн, аймгийн арслан Д.Батжаргал, Ж.Мөнгөн, Л.Лха-Очир, Ж.Сүхбат, О.Хангай, Г.Баасандорж нарын зэрэг улс аймгийн алдар цолтой хүчит 64 бөх барилдлаа.
Барилдааны 3-ын даваанд улсын начин Л.Нямсүрэн Ургамал сумын харьяат, сумын шилдэг заан П.Өсөхбаатарыг амлаж хөнтрөнгүүтээ араар нь цохиж давлаа. Мөн даваанд а.а Г.Баасандорж а.з Б.Бадамсүрэнг арал чацаар илүүрхэн шуудагны барьцнаас баруун мордож давснаар даваа өндөрлөв.
4-ийн даваанд өсөх идэр начин Ш.Уламбаяр өнөө жилийн Говьсүмбэр аймгийн наадмын түрүү бөх, Баянхайрхан сумын харьяат Ганболдын Баасандоржийг орхисон бол өсөх идэр начин Ж.Отгонбаяр аймгийн арслан О.Хангайтай оноолт таарч тахим буулгав. У.н Л.Нямсүрэн а.а Л.Лха-Очирыг урдуураа хөнтөрч давав. Мөн аймгийн наадмын нэлээд олон шөвөгтэй арслангууд болох Д.Батжаргал Ж.Мөнгөн нар оноолт таарч Төвийн арслан хаялцах барьцнаас мушгиад давлаа.
 5-ын даваанд у.н Ш.Уламбаяр Төв аймгийн Мөнгөнморьт сумын харьяат а.а Ж.Мөнгөнийг амлаж давав. Тунасан хоёрын барилдаан тун сонирхолтой болж ойрд харагдаагүй гайхамшигтай уран барилдааныг Завханы начин үзүүлж элэг бүсний барьцнаас уран гоё өмсөж үзэгч олныг баясгасан юм. Тэргүүн байрын төлөө нэг нутгийн 2 начин үлдэж Л.Нямсүрэн начин давхар шуудагны барьцнаас мушгиж түрүү бөхөөр тодров. Ийнхүү Завханы энэ сарын барилдаанд Баянтэс сумын харьяат Монгол улсын уран барилдаант начин Лувсанрагчаагийн Нямсүрэн түрүүлж, Тосонцэнгэл сумын харьяат улсын өсөх идэр начин Шүхэртийн Уламбаяр үзүүрлэлээ. Их шөвөгт Төвийн Жадамбаагийн Мөнгөн, Ховдын Оргихын Хангай арслангууд шалгарлаа.

Дөрвийн даваа
1. У.н Ш.Уламбаяр - а.а Г.Баасандорж
2. У.н Ж.Отгонбаяр - а.а О.Хангай
3.  У.н Л.Нямсүрэн - а.а Л.Лха-Очир
4. А.а Д.Батжаргал - а.а Ж.Мөнгөн

Тавын даваа

1. У.н Ш.Уламбаяр - а.а Ж.Мөнгөн
2. У.н Л.Нямсүрэн - а.а О.Хангай

Зургаагийн даваа

1. У.н Ш.Уламбаяр - у.н Л.Нямсүрэн

МУИС-ийн оюутан Т.Түмэндэмбэрэл