Уухайн түрлэгтэй сурынхны шинэ жил

Монголын Үндэсний сурын холбоо энэ сарын 21-нд шинэ жилийн баяраа тэмдэглэн өнгөрүүллээ. Тус шинэ жилийн цэнгүүнд  ССАЖЯ-ны дэд сайд Түмэнжаргал, Сурын холбооны дэд тэргүүн Батнягт, Биеийн тамир спорт хорооны хэлтсийн дарга Болормаа, Уламжлалт харваачдын холбооны тэргүүн Зоригт нарын эрхмүүд уригдан ирсэн байлаа. Үндэсний уламжлалт эрийн гурван наадмынхаа нэгээр одтой нааддаг эрхий мэргэн харваачдын баярын хөтөлбөрт уртын дууны шууранхай,  морин хуурын аялгуу, уухайн түрлэг орсон нь тэдний онцлогийг илтгэх мэт. Салбар салбарт ажилладаг ч сураар холбогдсон харваачид тал талын авьяастай хүмүүс юм билээ. Ямартаа л бэлтгэсэн урлагийн тоглолтууд нь дараалал үүсгэж зохион байгуулагчдаа сандаргаж байхав. 

Он солигдох торгон мөчид салбар бүр өөрийн шилдгүүдээ тодруулдаг уламжлалтай. Энэ дагуу Сурын холбооны тэргүүлэгчдийн шийдвэрээр 2013 онд болсон Нээлтийн харваа, Улсын аварга шалгаруулах, Улсын баяр наадам, Багийн аварга шалгаруулах, Отго харвааны нийлбэр дүнгээр чансаатай харваачдаа тодруулж, энэ үдэш зарласан. Үүнд:
Эрэгтэй харваачдаас:
1. Ховд аймгийн Булган сумын уугуул, МУ-ын хошой мэргэн Л.Отгонбаяр 172,5 оноогоор 2013 оны чансаатай харваачдын нэгдүгээрт эрэмбэлэгдлээ.
2. МУ-ын спортын мастер, “Алдар” спорт хороо, “ЖЭМ интернэйншл” компанийн харваач Б.Батбаатар 170 оноогоор
3. МУ-ын мэргэн, “Алдар” спорт хороо, “Монгол Ус” ТӨҮГ-ын харваач Б.Баярсайхан 164,5 оноогоор
4. МУ-ын хошой мэргэн “Хүч” спорт хороо, “АПУ” трейдинг компанийн харваач Ц.Баасанхүү 157 оноогоор
5. МУ-ын спортын мастер, “Петровис” компанийн харваач Д.Ганбат 146 оноогоор тус тус эрэмбэлэгджээ.
Харин эмэгтэй харваачдаас:
1. Хэнтий аймгийн Дадал сумын уугуул, “Зуун мэргэн” холбооны харваач МУ-ын Гоц мэргэн Х.Оюунчимэг 180 оноогоор
2.  МУ-ын хошой мэргэн, “Петровис” компанийн харваач Д.Эрдэнэтуяа 170,5 оноогоор
3. МУ-ын спортын мастер, “Дорнын Гэрэгэ” компанийн харваач Ч.Гандаваа 160,5 оноогоор
Оны шилдэг ахмад эрэгтэй, эмэгтэй харваач:
1. МУ-ын спортын дэд мастер, Сонгинохайрхан дүүргийн харваач П.Гармаа 124 оноогоор
2. МУ-ын мэргэн, “Хүч” спорт хороо, “АПУ трейдинг” компанийн харваач Д.Цэцэг 131,5 оноогоор тус тус шалгарчээ.
Хүүхдүүдээс оны манлай эрэгтэй харваач:
1. Бор-Өндөр сумын харваач Э.Төгөлдөр 59 оноогоор
2. “Зуун мэргэн” холбооны харваач Т.Даваацэрэн 59 оноогоор
Хүүхдүүдээс оны манлай эмэгтэй харваач:
1.  МУ-ын спортын мастер, “Зуун мэргэн” холбооны харваач Б.Отгонжаргал 65,5 оноогоор
2. Өмнөговь аймгийн харваач П.Энх-Эрдэнэ 61 оноогоор
Оны шилдэг нум үйлдвэрлэгч:
1.  МУ-ын гоц мэргэн, Өмнөговь аймгийн уугуул Ж.Баттөмөр
Оны шилдэг сум үйлдвэрлэгч:
1. МУ-ын спортын мастер, “Алдар” спорт хорооны харваач Б.Энхсайхан
Оны шилдэг дасгалжуулагч:
1. МУ-ын спортын мастер, “Зуун мэргэн” холбооны харваач Л.Сүхбат
Оны онцлох харваач:
1. МУ-ын спортын дэд мастер, Дундговь аймгийн харваач Г.Мөнхсайхан
Оны шилдэг ивээн тэтгэгч байгууллага:
1. “Алдар” спорт хороо
2. “Таван Толгой транс”
3. “Зуун Мэргэн” холбоо тус тус шалгарлаа. Мөн энэ онд спортын мастер, дэд мастер болсон харваачид үнэмлэх энгэрийн тэмдгээ гардан авсан юм.
Хундага харшин, ерөөл цалгисан  сурынхны баяр халуун дулаан уур амьсгалтай болж өндөрлөлөө. Ийнхүү нэгэн оны ололт амжилтаа дүгнэсэн тэдний хувьд ирэх жил илүү ихийг хийж бүтээсэн жил байх нь гарцаагүй. 2014 он Үндэсний өв соёлыг хойч үедээ өвлүүлэх их үүргийг хүлээсэн эрхий мэргэн харваачдын хувьд шинэчлэлт, өөрчлөлтийг өөрөөсөө эхэлсэн жил байж, энэ бүхнээ 15-р чуулганаараа харуулах бизээ.

П.Ундраа