Хурц арслан нутгийнхаа барилдаанд түрүүллээ

Дуу хуурын өлгий нутгийнхан “Шонхор” биеийн тамирын дээд сургуулийн зааланд бэлтгэлээ хийцгээж, залуус нь бэлтгэл хийх урамтай, цолтнууд нь тэдэндээ зааж сургах журамтай, түүний сацуу өөрсдийнхөө бэлтгэлийг жигдрүүлэх болсон нь тун сайшаалтай юм. Тиймээс ч энэ удаагийн барилдаанд санаснаас нэлээд олон буюу 96 хүчтэн зодоглов.
Эрдэнэдалайн эрэмгий барилдаантай Алтангэрэлийн Алтанхуяг, өчнөөн жил зодоглож өнөө жил арслан болсон, Говь-Угтаалын “дүүгүүр” Занданбат, Сайнцагааны “дуучин” Өлзиймөнх нараар манлайлуулсан бөхийн барилдаан дуулгах сонинтой, дурсах юмтай, дуу хууртай сайхан боллоо.
Бөхийн барилдааны хоёрын даваанд Луусын ах дүү заануудын бага С.Лундаа учраагаа өвдөг шороодуулсан бол ах С.Бүргэд нь Адаацагийн Б.Амарбаярт өвдөглөв. Харин С.Очирсүх нь Эрдэнэдалайн З.Төгөлдөрөөр даваагаа ахиулав. Эрдэнэдалайн Элбэгзаяагийн Золбоот нутгийнхаа “циркчин” Д.Мөнхбатыг орхиж дараагийн даваанд барилдахаар боллоо.
Гурвын даваанд хурц арслан Луусын Лундааг давуулж гуядаад давсан бол хуучны бөх, шинэ арслан Занданбат Эрдэнэдалайн Баттогтохыг дархан мэхээрээ дүүгүүрдэж орхив. Чулуундаваагийн Мөнхбаяр Дагдангийн Цэнгэлбатыг зүүн хавираад, шинэ заан Б.Бат-Эрдэнэ а.н Ч.Мөнх-Эрдэнийг сугадаж шигшиж өргөөд, Дэрэнгийн Г.Баяржавхлан Эрдэнэдалайн Э.Золбоотыг тахимдаад тус тус давсан бол Өмнөговьд харцага болсон Өндөршилийн Хүрэлбаатарын Батбаяр Эрдэнэдалайн Эрдэнэбатын Дашийг амлаад дан золгооноос татуулж унав. Тунасан хоёрын барилдаанд Луусын С.Очирсүх Эрдэнэдалайн Энхболдыг хутгаад суулгачихав.
Оноолтын даваанд хурц арслан А.Алтанхуяг с.з С.Очирсүхийг хавираад, Т.Занданбат Улаанхүү начны хүү с.з Мөнхчулууныг мордоод, с.з Э.Даш а.а О.Өлзиймөнхийг барьц сонгож мордоод, Дондогийн Дэлгэрбат Батсуурийн Энхбатыг хонгодож цацаад тус тус давав.
Тавын даваанд Эрдэнэдалайн хоёр арслан хүч үзэж давхар золгооноос даацтай гуядсан хурц арслан давсан бол Төмөрчөдөрийн Занданбат Эрдэнэбатын Дашийг давхар шуудагдсан барьцнаас мушгиад хөндлөн түрээд, Амгалангийн Саруулсайхан Батсайханы Бат-Эрдэнийн баруун хөлийг аваад тус тус давж их шөвөгт шалгарав.
Зургаад хурц арслан гоцлож, Говь-Угтаалын хоёр арслан хүч үзэж барьц сонгооноос Занданбат давлаа.
Үзүүр булаалдах барилдаанд арслангууд ээлжлэн барьц сонгож хурц арслан мордож давснаар энэ өдрийн түрүү бөхөөр тодорлоо.
Оноог дөрвийн даваанаас үзнэ үү.

Дөрвийн даваа
1. А.Алтанхуяг а.х.а – С.Очирсүх с.з
2. Т.Занданбат а.а – У.Мөнхчулуун с.з
3. О.Өлзиймөнх а.а – Э.Даш с.з
4. А.Саруулсайхан а.а – Г.Баяржавхлан а.н
5. Д.Дэлгэрбат а.а – Б.Энхбат а.н
6. Б.Бат-Эрдэнэ а.з – Ч.Мөнхбаяр а.з

Тавын даваа
1. А.Алтанхуяг а.х.а – Д.Дэлгэрбат а.а
2. Т.Занданбат а.а – Э.Даш с.з
3. А.Саруулсайхан а.а – Б.Бат-Эрдэнэ а.з

Зургаагийн даваа
1. А.Алтанхуяг а.х.а – гоцлов
2. Т.Занданбат а.а – А.Саруулсайхан а.а

Долоогийн даваа
1. А.Алтанхуяг а.х.а – Т.Занданбат а.а

МУИС-ийн оюутан Т.Түмэндэмбэрэл