Хонгор нутгийн уяачид шилдгүүдээ тодруулав

Даваагийн Мөнх-Эрдэнэ тэргүүнтэй Баянхонгор аймгийн "Хонгорын хурд" МСУХ-ны хамт олон 2013 оны шилдгүүдээ тодруулжээ. Тус аймгийн энэ жилийн  шилдгийн шилдэг уяачаар Баян-Овоо сумын харьяат Цэндийн Энхтайван шалгарсан байна. Түүний хонгор халзан морь /Сүхбаатар аймгийн Онгон сумын аймгийн Алдарт уяач Баатарын Буян-Оршихийн унаган/ нь улс болон “Их хурд” уралдаанд тус тус айрагдаж Гиннесийн уралдаанд түрүүлсэн юм.
Шилдэг уяачаар хурдан хонгор азарга /Дорнод аймгийн Матад сумын МУ-ын Алдарт уяач Гэлэгийн Чадраабал агсны унаган/ нь их хурдад айрагдаж, төвийн бүсэд түрүүлсэн Баянцагаан сумын аймгийн Алдарт уяач Дамбын Баяраа, хурдан бор азарга нь аймагтаа түрүүлж, “Их хурд”-д айрагдсан Баян-Овоо сумын аймгийн Алдарт уяач Дамдинсүрэнгийн Жаргалсайхан,  аймаг, бүсийн чанартай уралдаануудаас 2 түрүү, 8 айраг хүртсэн Баацагаан сумын уяач Б.Батхүү нар шалгарчээ. Түүнчлэн Говийн бүсийн шилдэг уяачаар Богд сумын уяач Д.Гансүх, Төвийн бүсийн шилдэг уяачаар Баацагаан сумын аймгийн Алдарт уяач М.Гэндэндорж, Хангайн бүсийн шилдэг уяачаар Жаргалант сумын харьяат аймгийн Алдарт уяач С.Пэрэнлэй нар шалгарсан байна.
Аймгийн шилдэг уяачдын холбоогоор Б.Бат тэргүүнтэй Баацагаан сумын "Унаган хүлэг" МСУХ шалгарч, морин уралдааны орчин үеийн гарааны төхөөрөмжөөр шагнуулсан аж. Шилдэг гал уяагаар Э.Төмөрсүх ахлагчтай Бууцагаан сумын "Буянтын хурд" гал шалгарсан бол шилдэг хурдан морь унаач хүүхдүүдээ сум тус бүрээс нэгийг тодруулсан гэнэ.

2014 онд Баянхонгор аймагт зохион байгуулагдах уралдааны товууд:

"Номгон хайрханы хурд" хаврын уралдаан - Хаврын дунд сарын шинийн 8-нд

Говийн бүсийн хаврын уралдаан - Баянлиг суманд

Төвийн бүсийн хаврын уралдаан - Бөмбөгөр суманд

Хангайн бүсийн хаврын уралдаан - Гурванбулаг суманд

Говийн бүсийн зуны уралдаан - Жинст суманд
Төвийн бүсийн зуны уралдаан - Баацагаан суманд
Хангайн бүсийн зуны уралдаан - Галуут суманд тус тус зохион байгуулагдахаар төлөвлөгдсөн байна.