Уйлган голын хурдан ажнай “Моторт” хул

Ардын хувьсгалын ойн баяр наадмуудад 16 түрүүлж, гурав айрагдан олноо “Моторт” хул хэмээн нэрлэгдсэн цуут хүлгийг  Цагаан-Үүрчүүд өдгөө ч дурсан ярилцдаг. Энэхүү хурдан буян олон эзний гар дамжин арилжигдсан ч анхны эзэн нь Уйлган багийн иргэн Дашдаваа юм. Тэрээр нэгдэл нийгэм задарч, мал хувьчлагдахад "Цог" нэгдлийн өмч  “Донгио”  хул гэх азаргатай  адуунаас  хул үрээ авчээ. Хөл хөнгөн хул үрээг хязааланд уябал сумынхаа наадамд түрүүлж, эзний магнайг тэнийлгэсэн бөгөөд соёолон болон нас нийлсэн жилээ амжилтаа бататган хоёр ч удаа түмэн эхээ дуудуулжээ. Өөрөөр хэлбэл Дашдаваа уяж хул морийг гурав түрүүлгээд Эрдэнэбулган сумын уугуул Д.Эрдэнэхишигт зарсан байна. Харин түүнээс Цагаан-Үүр сумын уугуул, аймгийн  Алдарт уяач Д.Баттөр худалдан авч уяа юуг нь тааруулах болсон байна.  Хул морь шинэ эзэндээ ирээд өөрийн болгон залгаа Чандмань-Өндөр сумдын баяр наадмуудад тоосоо өргөн есөнтөө  түрүүлж магнай юугаа мялаалгасан байдаг.
Хул мориор эрийн хийморь сэргээсэн дараагийн хүн бол улсын Аварга хадланч Ч.Чойжин болон түүний хүү Ч.Болд нар  юм. Мотор хул Ч.Чойжингийн нэр дээр хоёр түрүүлж, харин хүү Ч.Болдынх нэр дээр хоёр түрүүлж, гурав айрагдсан  байдаг. Ийнхүү уралдсан болгондоо түрүүлж айрагдан Цагаан-Үүрийн нэрийн хуудас болсон шандаст хурдан хүлэг 2008 онд зодог тайлсан бөгөөд тэрхүү ёслолыг аймгийн Алдарт уяач Д.Баттөр агсны ах дүүс сумын засаг даргын тамгын газар болон МСУХ хамтран зохион байгуулжээ.

А.Мөнх