Мэргэчүүл “Сурын их шүтээн”-д дүрээ мөнхөлнө

Өвөрхангай аймгийн Хархорин суманд Монгол түмний эрийн гурван наадмын мөнхийн цогцолборыг байгуулахаар болсон байна. Одоогоос хэдэн жилийн өмнө морины төлөө сэтгэл зүрхээ зориулан санаа нийлсэн олон Морины их шүтээнийг босгосон нь өдгөө гадна, дотны зочид гийчдийн очих дуртай газрын нэг болжээ. Тэгвэл энд нэмж бөх, сурын шүтээнийг байгуулах ажлыг эхлүүлэх гэж байгааг МУ-ын Дархан аварга Х.Баянмөнх, Д.Цэрэнтогтох, МУ-ын Тод манлай уяач Д.Даваахүү, Э.Эрдэнэчулуун, МУ-ын мэргэн ЦХүдэрчулуун, Сурын холбооны нарийн бичгийн дарга Хүрэлбаатар нар дуулгалаа.
Энэхүү монгол түмний сурын их шүтээн нь Морины их шүтээний баруун хойно байрлах бөгөөд 100:89 метрийн эвшээж татсан нумын хэлбэртэй байх ажээ. Талбайн хоймор хэсэгт 18:35 метрийн хүндэтгэлийн талбай, хойд талд нь 9 метр өндөр зургаан багана бүхий байгууламжийн дээр 6.5 метр өндөр зэв байрлаж, зэвийн дээр хөх тэнгэрийн эзэн шонхор шувууг урд зүгт харуулан байрлуулна. Харин голын дөрвөн багана дор Есүнхэй мэргэнд зориулсан гэрэлт хөшөөг гол шүтээнээ болгож, үүний хоёр талд сур, таван сумны хөшөөг байрлуулан, хөшөөний хоёр талд нум саадгаа агссан баатрын хөшөө байх ажээ. Шүтээний гол хэсгийн хоёр талын дурсгалын самбар дээр суртай холбоотой түүх, Ардын хувьсгалаас хойш улсад түрүүлсэн мэргэчүүлийн нэрс байрлах агаад шүтээний баруун, зүүн талд Дархан, Даяар дуурсах, Гарамгай, Гоц, Хошой 26 мэргэний хөшөө байрлана. Үүнд: МУ-ын Дархан мэргэн Ч.Мөнхцэцэг, МУ-ын Даяар дуурсах мэргэн Говь-Алтай аймгийн харьяат Магнай, МУГЖ Ш.Даваахүү, Дорнод аймгийн Х.Даваажаргал, МУ-ын Гарамгай мэргэн Сэлэнгэ аймгийн Ерөө сумын уугуул Оригийн Адилбиш,Төв аймгийн Заамар сумын уугуул М.Дашцэрэн, Дорнод аймгийн Баян-Уул сумын харьяат А.Цэвээн, Дорнод аймгийн Баян-Уул сумын харьяат Ц.Хүдэрчулуун, МУ-ын Гоц мэргэн Баян-Өлгий аймгийн харваач Т.Лонжид, Хөвсгөл аймгийн Цэрэндулам, Дорнод аймгийн Бор-Охин, Дорнод аймгийн Баян-Уул сумын Ц. Гэнин, Өмнөговь аймгийн Манлай сумын Ж.Баттөмөр, Хэнтий аймгийн Дадал сумын уугуул Х.Оюунчимэг, МУ-ын хошой мэргэн Сүхбаатар аймгийн Сүхбаатар сумын уугуул Д.Сүхбаатар, Төв аймгийн Лүн сумын Л.Мишигсанаа, Төв аймгийн Дэлгэрхаан сумын Ш.Ишчогдог, Дорнод аймгийн П.Долгормаа, Сэлэнгэ аймгийн Цагааннуур сумын Д.Дэлгэржав, Сэлэнгэ аймгийн Ерөө сумын Р.Чойжсүрэн, Дорнод аймгийн Ж.Гүнбадрал,  Ховд аймгийн Д.Түвшин, Дорноговь аймгийн Г.Цэгмид, Баян-Өлгий аймгийн Сагсай сумын Ц.Баасанхүү, Дорнод аймгийн Д.Эрдэнэтуяа, Ховд аймгийн Булган сумын Л.Отгонбаяр нарын  26 мэргэний дүр хөшөөнөө мөнхлөгдөх нь ээ. Энэ ажил ирэх гуравдугаар сараас эхлэх бөгөөд монгол түмнийг “эвтэй байхдаа хүчтэй”-гээ харуулна хэмээн зохион байгуулагчид ярьж байна.

П.Ундраа