"Тэсийн голын ажнай унага" уяачдын холбооны тэргүүн М.Баттулга: Морины од хийморь намайг түшсэн

Макс угшлын адуун сүргийн ээлжит дуудлага худалдаа энэ сарын 7-нд зохион байгуулагдах гэж байгаа билээ. Урьд жилүүдэд зохион байгуулагдаж байсан дуудлага худалдаанд оролцож, улс, бүсийн наадамд олон айрагдаж, түрүүлж байсан Асгат саарлын төлүүдийг авч байсан Увс аймгийн Тэс сумын "Тэсийн голын ажнай унага" уяачдын холбооны тэргүүн М.Баттулгатай холбогдож сэтгэгдлийг нь сонссон юм. 

-Тод манлай нарын зохион байгуулдаг дуудлага худалдааны талаар сэтгэгдлээ хуваалцана уу. Та энэ дуудлага худалдаанаас ямар адуу авч байв?
-Тод манлай Онон, Цэрэнжигмэд, Ганбаатар, Асгат саарлын эзэн Баяраа нар санаачилсан адууны дуудлага худалдаа хоёр жил дараалан болсон. Урьд нь зохион  байгуулагдсан дуудлага худалдаанаас би даага худалдаж авч байсан юм. Гурван жилийн өмнө л дөө. Ноднин бас саарал даага худалдаж авсан. Одоо нэг нь хавчиг үрээ, нөгөөдөх нь шүдлэн үрээ. Хоёулаа Асгат саарлын төл.
-Танд ирээд ямар амжилт гаргасан бэ?
-Миний хонгор үрээ Булганы бүс, Төв аймгийн Цээл, Бүрэгхангай, мөн өвлийн уралдаануудад айрагдсан. Харин энэ жил соёолондоо Ардын хувьсгалын 92 жилийн ойн баяр наадамд 21-ээр давхисан юм.
-Ер нь тухайн үед та хоёр даагаа ямар үнэ ханшаар авч байсан бэ?
-Үнэ ханшны хувьд үнэтэй цайтай биш, өөрийнхөө боломжоор л авч байсан. Морины од хийморь намайг түшсэн юм болов уу, тэр хүмүүсийн сайхан буян надад ирээд давхиж байгаад баяртай байдаг. Өнгөрсөн хавар саарал даагыг зургаан саяар авч байсан. Ер нь монгол адуугаа, уяачдаа дэмжсэн байдлаар Тод манлай нар дуудлага худалдаа хийдэг байх гэж ойлгодог. Мөн сурсан мэдсэнээсээ бидэн шиг залуу уяачидтай хуваалцдаг. Ер нь моринд хорхойтой хүмүүсийн сонирхлыг ажиглаж мэдэрдэг, хараатай хүмүүс болов уу гэж боддог юм.
-Энэ удаагийн дуудлага худалдаанд та оролцох уу?
-Сургийг нь сонссон. Хагас сайн өдөр болно гэсэн. Ямар ч гэсэн найз нөхөдтэйгөө очно доо. Тухайн байдлаасаа харж үзэж байгаад таалагдах адуу байвал авна даа.
-Ярилцсанд баярлалаа.