Аймгийн Алдарт уяач Н.Батхуяг: "Макс"-ын дуудлага худалдаанаас авсан адуу сайн давхиж байгаа

Тод манлай уяач Д.Цэрэнжигмэд, Д.Ганбаатар нарын санаачилгаар Монголд анх удаа адууны дуудлага худалдаа өнгөрсөн хавар "SS club"-д болсон билээ. Ах дүү Тод манлайн улс, бүсийн наадамд олон түрүү, айраг хүртэж байсан Асгат саарал, Сөнгө зээрд, Зандан хүрэн, Жигүүр хул, Шарга азарга, Хар шилбэт зэрэг хурдан азарганы үр төлийг дуудлагаар худалдаалах болж 13 адууг нэрлээд байсан бол Монгол Улсын Тод манлай уяач Д.Онон, С.Ганхуяг, Манлай уяач Д.Одгэрэл, Б.Билэгдэмбэрэл, Алдарт уяач Э.Ганбат нар нэмэгдээд 26 болсон юм. Энэ үеэр Увс аймгийн Баруунтуруун сумын уугуул, “Турууны ундарга” компаний захирал, аймгийн Алдарт уяач Н.Батхуяг Макс угшлын соёолон үрээг 6 сая төгрөгөөр худалдан авч байлаа. Харин энэ удаад бид түүний сэтгэгдлээс сонирхсон юм.
-Өнгөрсөн хавар  болсон адууны дуудлага худалдааны талаарх сэтгэгдлээсээ хуваалцана уу?
-Ах дүү Тод манлай уяачдын санаачилсан энэхүү адууны дуудлага худалдаа үнэхээр их таалагдсан. Миний хувьд Макс угшлын соёолон үрээ худалдаж авсан юм. Эцэг нь Будённый угшилтай Оросоос орж ирсэн Бунт хээр азарганы төл. Харин эх нь улсад айрагдсан Арвай хээр азарганы удам, Сохор хүрэн гүүний төл бөгөөд Говь-Алтайн даншиг наадамд зургаад хурдалж байсан юм билээ.
-Танд ирээд ямар амжилт гаргаад байна вэ?
-Энэ жил сунгаануудад их сайн байсан ч наадмын өмнөхөн ханиад хүрээд улсад 19-өөр давхисан. Дараа нь Төв аймгийн бүсийн наадамд мордуулах санаа байсан ч эрлийз адуу уралдуулахгүй гэхээр нь яваагүй. Өөрөөр хэлбэл, энэ жил нэг л уралдчихаад байна. Сунгаануудаас харж байхад  хурдан байгаа нь харагдсан. Дараа жилээс юм дуулгана гэж найдаж байгаа шүү.
-Дуудлага худалдаагаар "Макс"-ын адуунууд ихэвчлэн гурван саяас эхэлж байсан. Та хэдээр авсан билээ?
-Шинэ цагийн адуу гаргаж авна гэдэг амаргүй ажил. Өмнө нь судалж үзэж байлаа. Хөрөнгө мөнгө болоод цаг хугацаа их ордог. Тэгэхээр олон жилийн хөдөлмөрийн үр шимээр бий болсон бэлэн давхилтай адууг зургаан сая төгрөгөөр авсандаа үнэхээр их олзуурхаж байгаа. Тиймдээ ч энэ хагас сайнд болох хоёр дахь удаагийн дуудлага худалдаанд найз нартайгаа очно доо.
-Ярилцсанд баярлалаа.

П.Ундраа