Б.Соронзонболд заан түрүүллээ

Хантайшир дэвжээний бөхчүүдийн энэ сарын ээлжит барилдааныг Цээл сумын харьяат Монгол Улсын гарди Ж.Бат-Эрдэнэ ивээн тэтгэн зохион байгуулсан юм.
Барилдаанд улсын заан Б.Соронзонболд, у.х Ж.Амартүвшин, у.н Л.Гантулга, С.Багахүү, Л.Цэрэнтогтох нарын тэргүүтэй 80 бөх зодоглон барилдлаа.
Барилдааны нэгийн даваанд Тайшир сумын харьяат с.х Э.Жүгдэрнамжил Алтай сумын заан Н.Баатарсүрэнгийн зүүн хөлд орж дэрлэж дараад давсан бол а.н Ж.Баянмөнх, А.Батзориг нар учраагаа хонгодож цацах, давуулж гуядах мэхүүдээр уран давлаа.
Хоёрын даваанд Шарга сумын харьяат, Шонхор дээд сургуулийн оюутан, Буман хишигтэн цэрэг ХХК-ий бөх с.з Э.Даваажаргал а.а Д.Цэрэндаваагийн суганд сэжиж ард нь гараад, Аварга ДС-ийн оюутан Хөхморьт сумын заан Г.Батмөнх аймгийн нэмэх начин Ч.Эрдэнэсайханыг дотуур дан хавираад, а.н А.Хосбаяр а.н Д.Нарангаравыг мордож дайраад, ц.н Б.Энхсайхан а.н Ш.Балжиннямыг хонгодож цацаад, а.н Ө.Дүүрэнбаяр а.н А.Батзоригийг хавирахад тулгуур хөлд нь мордоод тус тус  давлаа. Мөн Дэлгэр сумын харьяат аймгийн начингууд оноолт таарч Тогтохмэндийн Сайханжаргал сэнжиг элэг бүснээс зайлж хөтлөөд Дашнямын Ганцоожийг шороодуулав.
Гурвын даваанд у.з Б.Соронзонболд Бигэр сумын харьяат аймгийн ахмад заан Д.Пүрэвжавыг амласан бөгөөд ахмад заан засуул дээр дэвэн гарахдаа өндөрт дэвхэрч үзэгчдийг хөгжөөсөн бөгөөд заантай барилдахдаа урагш довтолсоор унав. Олон жил тогтмол сайн барилдаж буй заанд талархмаар. Мөн барууны  магнай у.х Ж.Амартүвшин с.з Э.Даваажаргалыг амлаж тахимдаад дайрсан ч с.з үлдэцтэй барилдаантай гэдгээ харуулж дагуулж хөмрөөд давчихав. Мөн у.н Л.Гантулга с.з Г.Батмөнхийг тахимдаж дайраад, у.н С.Багахүү а.н Ч.Золбоог шуудагдаж түрээд, а.х.а Ш.Шинэбаяр а.н Ж.Баянмөнхийг тахимдаж түрээд, а.а Б.Хишигбаатар а.н Ө.Дүүрэнбаярыг сугадаж мушгиад угсруулж тавхайлдаж түлхээд, а.а Ж.Алтаншагай а.з Д.Буянтыг дутуу хутгахад ард нь гарч сунгаж татаад, ц.н Б.Энхсайхан а.н А.Хосбаярыг хөмрөхөд ард нь дараад давлаа. А.н Т.Сайханжаргал у.н Л.Цэрэнтогтохыг дутуу хавирахад мэдэрч татаад, а.х Ц.Эрхэмбаяр а.а Ц.Үржинбаатарыг давхар хамж цацаад сайхан давцгаав.
Оноолтын даваанд заан Б.Соронзонболд с.з Э.Даваажаргалаар давсан бол Цээл сумын харьяат улсын начин, цэргийн начин хоёр оноолт таарч у.н давав. Гэсэн ч давангуут нидэрч улмаар сэгсэрч босгосон бөгөөд нэг нутгийн залуу начинд ингэж хандсанд дургүйлхэх үзэгч олон байлаа. Тэд талбай дээр маргаж гар зөрүүлэх шахсан бөгөөд тэдний хажууд барилдаж байсан у.н С.Багахүү ц.н Б.Энхсайханыг мөн загнаж байлаа. Үлгэр дуурайлал болох ёстой ахлах цолтнууд маань ийм байдал гаргах болсон нь тун тоогүй.
Энэ даваанд у.н С.Багахүү а.н Т.Сайханжаргалаас барьц сонгож муриад, а.х.а Ш.Шинэбаяр а.х Ц.Эрхэмбаярыг дутуухан суухад голлож дайраад, а.а Ж.Алтаншагай а.а Б.Хишигбаатарыг хавирахад тахимдаад тус тус давлаа.
Тавын даваанд заан гоц мөргөж, у.н Л.Гантулга а.а Ж.Алтаншагайг амласан бөгөөд баруун талдаа нааж хавирахад нь сөрж зүүн хавираад а.а давав. Тунасан хоёрын барилдаан төдий удсангүй, начин баруун хавираад өвдөг шороодуулав.
Зургаагийн даваанд начин гоц мөргөж заан Б.Соронзонболд а.а Ж.Алтаншагайг зүүн талдаа давхар тохоод орхив.
Үзүүр түрүүний барилдаанд зүүн талдаа тосгуулж хавираад заан давж, начин С.Багахүү үзүүр булаалаа.
Дараагийн барилдааныг энэ удаагийн барилдааны түрүү бөх улсын заан Б.Соронзонболд ивээн тэтгэж зохион байгуулах ажээ.

МУИС-ийн оюутан Т.Түмэндэмбэрэл