Манлайлсан арслангууд үзүүр булаалдлаа

Өвөрхангай аймгийн харьяат бөхчүүдийн ээлжит барилдаан Баянзүрх дүүргийн 102-р сургуулийн спорт зааланд өнгөрсөн Бямба гарагт боллоо. Барилдааныг Нарийнтээл сумын харьяат Монгол Улсын Хөдөлмөрийн Баатар, Гавьяат тамирчин Даяар дуурсагдах далай даян дархан аварга Дашдоржийн Цэрэнтогтох, Гучин-Ус сумын харьяат Монгол Улсын  Хөдөлмөрийн Баатар, Гавьяат дасгалжуулагч Чимэдбазарын Насантогтох, Ардын багш, Гавьяат тамирчин, Олимпийн хүрэл медальт, Чимэдбазарын Дамдиншарав нар хүрэлцэн ирж сонирхсон бөгөөд нутгийн залгамж халаагаа хэр өсч, сайжирч буйг шинжин хууч хөөрөн сууцгааж байлаа.
Барилдаанд аймгийн арслан Д.Болдбаатар, Б.Батдорж, Ц.Жамсран нараар манлайлуулсан хүчит 44 бөх барилдав.
Бөхийн барилдааны нэгийн даваанд Нарийнтээл сумын заан Н.Загархорол а.н О.Түмэндэмбэрэлийг мордоод, Хужирт сумын заан М.Ууганбаатар а.н Г.Пүрэвдоржийг шахаж татаад, Сант сумын заан Г.Тулгатөр Нарийнтээл сумын заан З.Баттөмөрийг дагуулж давхар ачаад, Нарийнтээл сумын заан Н.Даваадагва Зүүнбаян-Улаан сумын заан Б.Цэдэнсодномыг шахаж татахад сөрж хавираад, Хархорин сумын заан О.Наранбаатар Өлзийт сумын заан С.Төмөрбаатарыг мордож дайраад тус тус давлаа. 
Хоёрын даваанд өнөө жилийн аймгийн баяр наадмын тавын даваанд хүч үзсэн а.з Д.Дарханбаатар, с.з О.Наранбаатар нар оноолт таарч аймгийн заан Д.Дарханбаатар бусгаж зайлаад дахин давсан бол Хархорин сумын харьяат а.х Б.Лхагва-Очир сумын заануудын барилдааны түрүү бөх, Баян-Өндөрийн Б.Цэрэндагвыг хонгодоод дайрахад дагуулж давхар ачаад давлаа. Мөн давааны төгсгөлд аймгийн начингууд оноолт таарч Т.Ядамсүрэн, Х.Гантулга, Н.Бат-Итгэл нар давав.
Гурвын даваанд а.а Д.Болдбаатар гоц мөргөж, а.а Б.Батдорж Баруунбаян-Улаан сумын харьяат а.н Н.Бат-Итгэлийг амлаж ард нь гараад, а.а Ц.Жамсран а.х Б.Лхагва-Очирыг амлаж тахимдаад дайрсан ч харцага дагуулж сунгаж татаад, Есөнзүйл сумын харьяат а.х Д.Мөнхболд а.з Д.Дарханбаатарыг татаж хавираад тус тус давав. Мөн Баян-Өндөрийн Л.Батсайхан ижил цолтой М.Даваасүрэнг амлаж унасан бол өнгөрсөн жилийн наадмын тавын даваанд тунаж байсан хоёр начин энэ барилдааны гурвын даваанд мөн тунан барилдаж таарч Уянга сумын харьяат а.н Х.Гантулга барьц сонгож мордоод давав.
Дөрвийн даваанд а.а Д.Болдбаатар а.н Х.Гантулгад барьц сонгуулсан ч дагуулж тонгороод, а.а Б.Батдорж а.х Б.Лхагва-Очирыг шахаж татаад давсан бол а.з М.Даваасүрэн а.х Д.Мөнхболдыг шороодуулж их шөвөгт шалгарав.
Тавын даваанд а.а Б.Батдорж гоц мөргөж а.а Д.Болдбаатар а.з М.Даваасүрэнг түрж хөөж мордож давснаар үзүүр булаалдахаар шалгарлаа.
Хэдхэн хоногийн өмнө Уянга суманд болсон барилдааны 4-ийн даваанд оноолт таарч барилдсан хоёр арслан энэ барилдааны үзүүр түрүүнд шалгарч Б.Батдорж арсланг мордоод түрэхэд Д.Болдбаатар арслан зүүн талдаа дагуулж даацтой хөмрөөд давж түрүүллээ.
Энэхүү барилдааны бай шагналыг Монгол Улсын начин П.Ганхүү, Б.Сангисүрэн, Б.Сугаржаргал, МҮБХ-ны ерөнхий нарийн бичгийн дарга Б.Цогтбаатар нар ивээн тэтгэсэн бөгөөд нутгийн зөвлөл болоод ивээн тэтгэгч байгууллагууд цааш цаашдын барилдаан дээр үүнийг анхаарах буй заа. Бөх болохоор зориг шулуудаж, бөхөд бүх амьдралаа зориулж, нутаг орныхоо нэрийг сайнаар дуудуулж яваа залуу хүчтэнүүдээ дэмжиж туслах нь лавтай биз ээ.
 Барилдааны дүйзийг хоёрын даваанаас сонирхоно уу.
Хоёрын даваа
1. Д.Болдбаатар а.а – Н.Загархорол с.з Нарийнтээл
2. Б.Батдорж а.а – М.Ууганбаатар с.з Хужирт
3. Ц.Жамсран а.а – Г.Тулгатөр с.з Сант
4. Д.Дарханбаатар а.з – О.Наранбаатар с.з Хархорин
5. Л.Батсайхан а.з – Н.Даваадагва с.з Нарийнтээл
6. М.Даваасүрэн а.з – Г.Цэнддорж с.з Бүрд
7. Д.Мөнхболд а.х – О.Үйтүмэн с.з Есөнзүйл
8. Б.Лхагва-Очир а.х – Б.Цэрэндагва с.з Баян-Өндөр
9. Т.Ядамсүрэн а.н – Р.Лхамжав а.н
10. Х.Гантулга а.н – Го.Ганзориг а.н
11. М.Балжинням а.н – Н.Бат-Итгэл а.н
Гурвын даваа
1. Д.Болдбаатар а.а - гоцлов
2. Б.Батдорж а.а – Н.Бат-Итгэл а.н
3. Ц.Жамсран а.а – Б.Лхагва-Очир а.х
4. Д.Дарханбаатар а.х – Д.Мөнхболд а.х
5. Л.Батсайхан а.з – М.Даваасүрэн а.з
6. Т.Ядамсүрэн а.н – Х.Гантулга а.н
Дөрвийн даваа
1. Д.Болдбаатар а.а – Х.Гантулга а.н
2. Б.Батдорж а.а – Б.Лхагва-Очир а.х
3. М.Даваасүрэн а.з – Д.Мөнхболд а.х
Тавын даваа
1. Д.Болдбаатар а.а – М.Даваасүрэн а.з
2. Б.Батдорж а.а – гоц мөргөв.
Зургаагийн даваа
1. Д.Болдбаатар а.а – Б.Батдорж а.а

МУИС-ийн оюутан Т.Түмэндэмбэрэл