Унаач О.Мөнхбаясгалан: Шагналынхаа мөнгийг дансандаа хадгалж байгаа

Бяцхан унаачдын амжилтын цувааг Дархан-Уул аймгийн Хонгор сумын уугуул Отгонбаатарын Мөнхбаясгалан үргэлжлүүлж байна. Есөн настай бяцхан унаач анх Сүхбаатар аймгийн 70 жилээр уяач Галсандоржийн хээр даагыг айргийн гурваар хурдлуулж байсан ажээ.

-“Тод магнай”-н уншигчдад өөрийгөө танилцуулна уу?
-Намайг Отгонбаатарын Мөнхбаясгалан гэдэг. Аав маань уяач хүн байгаа юм. Би аавынхаа хүрэн морь, буурал, хээр үрээнүүд, зээрд даага, бор морь, хонгор халзан даага, бор азаргыг унаж уралддаг. Эндээс бор азарга нь Салхитад нэг, Дарханд нэг тус тус түрүүлсэн. Бас хүрэн морь Дарханд яг л тавлахаар байсан ч хадуураад долоогоор орсон. Хадуурдаг морь амаргүй л дээ.
-Мөнхбаясгалан унаач ямар ямар уралдаанд оролцож байв?
-Анх Сүхбаатар аймгийн 70 жилээр  уяач Галсандоржийн хээр даагыг унаж гуравлуулж байлаа. Түүнээс хойш олон уралдаанд оролцож байна. Булганд Олимпийн аварга Түвшинбаярын наадамд энэ хээр даагаа бас гуравлуулсан. Хээр даага бид хоёр олон уралдаанд оролцож байна. Мэдээж таван насны морь унадаг л даа. Эндээс айраг түрүүнд хурдалдаг хээр үрээндээ их хайртай.
-Олон наадамд уралдлаа гэж байна. Эндээс хамгийн гоё наадмынхаа тухай сонирхуулаач?
-Анхны наадам, бас анхны айраг гэдэг утгаараа Сүхбаатар аймгийн 70 жилийн наадам их сайхан санагддаг юм. 400 гаруй даага уралдаад айргийн гурваар давхиулсандаа би үнэхээр их баярласан. 
-Тэгвэл морь унаж уралдаад авсан хамгийн гоё бай шагнал гэвэл?
-Дахиад л Сүхбаатарын наадмын хэлнэ дээ. /инээв/  Би сая төгрөг, бэлэг, өргөмжлөл авсан. Уяач ах маань надад данс нээж өгсөн байгаа. Морио сайн унаж, шагналаа цуглуулж байгаад том болоод хэрэглэнэ дээ. Бас өнгөрсөн өвөл аймгийн оны шилдэг унаач болж, медаль авсан. Энэ бүхэн надад илүү их амжилт гаргаж, уралдах урам зоригийг нэмдэг юм.
-Том болоод ямар мэргэжилтэй болох вэ?
-Уяач болно доо. Харж байхад уяачийн ажил хэцүү юм шиг байна лээ. Гэхдээ жаргалтай үе түүнээс их болов уу. Жишээ нь унаач бид нар хол наадамд явахад их ядардаг. Морин дээрээ зүүрмэглээд явдаг ч уралдаж байхдаа ядарч байгаагаа мартчихсан байна гээч. Энэ л монгол адууны “ид шид” байх гэж боддог юм.
-Хүсэл мөрөөдлөө биелүүлж сайн уяач болоорой. Дүүдээ баярлалаа.

П.Ундраа