Хоймор нутгийн бахархал- Таван цагаан

Хоймор нутгаас зорин ирж тоосоо өргөсөн Таван цагаан төрийнхөө наадамд хоёр дахиа айрагдсан, уясан эзэн, унасан хүүхэд, нутаг усныхнаа цэнгүүллээ. Өнгөрсөн жил аман хүзүүнд хурдалсан энэхүү хурдан буян Хөвсгөл аймгийн Тариалан сумын уугуул, МУ-ын Алдарт уяач Гордоогийн Доржпүрэвийн Араб азарганы анхны төл бөгөөд эх нь алдарт Тэсийн голын унага гэдэг. Орон нутгийн наадмуудад тогтмол амжилттай нааддаг Таван цагаан өнөө жилээс Б.Ганбаярын аав, аймгийн Алдарт уяач Дондогийн Бадрахын нэр дээр уралдаж байгаа бөгөөд томоохон наадамд үзүүлсэн амжилтыг сийрүүлбээс:
- 2012 онд АХ-ын 91 жилийн ойн баяр наадамд аман хүзүү
- 2012 онд Да лам Цэрэнчимэдийн мэлмий гийсний 140 жилийн ой, төвийн бүсийн уралдаанд айргийн дөрөв
- 2013 онд АХ-ын 92 жилийн ойд айргийн тав
- 2013 онд Архангай аймгийн 90 жил, хангайн бүсийн наадамд айргийн дөрөвт тус тус хурдлаад байна. Далай ээжийн нутгийн дархан хүлгэдийн нэг Таван цагаан цаашид ч монгол түмнээ олон жил цэнгүүлэх бизээ.

А.Мөнх