Баян-Өлгий аймгийн аварга шалгаруулах барилдаан боллоо

Баян-Өлгий аймгийн аварга шалгаруулах барилдаанд а.а Б.Серик, а.а М.Еркебулан, а.з М.Аманбек нараар манлалуулсан хүчит 48 бөх барилдав. Барилдаанд у.х О.Бахыт, а.а Х.Асен, Х.Айдос нар зочноор уригдан ирсэн бол а.а Б.Баатарцол, а.н Н.Мустафа, У.Береке, Д.Бейбит нар бэртэлтэй учир барилдаагүй байна. Мөн Баян-Өлгий аймгийн уугуул, Сэлэнгэ аймгийн Мандал сумын харьяат сумын заан Хуанбекийн Жанболат зодоглон барилдаж сумын заан Самарханы Заманбекээр гурав давжээ. Хилчин спорт хорооны тамирчин, 2010 оны Баян-Өлгий аймгийн наадмаар начны даваанд барилдаж үзсэн Саматын Шалхар хэмээх залуу сумын заан Жанатын Бахытжантай тунан барилдаж өвдөг шороодуулан сүүлийн 6-т шалгаран үлдсэн байна.
Дөрвийн нугалаанд а.з М.Аманбек, а.х Б.Төмөрбаатар нар хүчийг үзэж Төмөрбаатар мордоод давсан бөгөөд сүүлийн гурван бөх тойргийн журмаар барилдан аваргаа тодруулжээ. М.Еркебулан арслан а.х Б.Төмөрбаатарыг давхар хамаад давсан ч Б.Серикт хутгуулан унажээ. 2011 оны наадмын үзүүр түрүүнд хүч үзэж М.Еркебулан давж арслан цол хүртэж байсан бол саяхан болсон эрэмбэ өндөр бөхчүүдийн барилдаанд нэгийн даваанд учраа таарч мөн М.Еркебулан давсан билээ. Харин энэ удаад хутгаж дайрсан мэхээ чулуу болгож залуу арслан Б.Серик давжээ. Дараагийн тойрогт өнөө жил аймгийнхаа наадамд 7-ийн даваанд тунан барилдаж хүч үзсэн хоёр бөх барилдаж шуудагдсан барьцнаас зайлж давснаар Улаанхус сумын харьяат Бердемуратын Серик аргагүй л шилдэг арслан гэдгээ нотлон харуулж аймгийнхаа оны тэргүүн бөх боллоо. Алтай сумын харьяат өнөө жил чимэг нэмсэн Малшын Еркебулан арслан бэлтгэл жигдэрч буйгаа харуулан хоёрдугаар байр эзэлсэн бол Булган сумын харьяат шинэ харцага Баянжаргалын Төмөрбаатар бөхийн өргөөнд харцага цолтой анх удаа барилдаж гуравдугаар байрын эзэн болжээ.
Энэхүү барилдааныг Таван Богдын бүргэдүүд дэвжээ, Өлгийн хүчтэн сан хамтран зохион байгуулсан бөгөөд шагналын сан өндөртэй сайхан барилдаан болжээ.
Дүйзийг гурвын даваанаас үзнэ үү.
Гурвын даваа
1. Б.Серик а.а – Д.Баурыжан с.з Улаанхус
2. М.Еркебулан а.а – Б.Бахыт с.з Булган
3. М.Аманбек а.з – А.Айбек с.з Булган
4. Б.Төмөрбаатар а.х – К.Нурбек с.з Цэнгэл
5. С.Заманбек с.з Баяннуур  – Х.Жанболат с.з Сэлэнгэ, Мандал
6. С.Шалхар с.з Улаанхус – Ж.Бахытжан с.з Баяннуур
Дөрвийн даваа
1. Б.Серик а.а – Х.Жанболат с.з
2. М.Еркебулан а.а – С.Шалхар с.з
3. М.Аманбек а.з – Б.Төмөрбаатар а.х
Тавын даваа
1. М.Еркебулан а.а – Б.Төмөрбаатар а.х
2. Б.Серик а.а – М.Еркебулан а.а
3. Б.Серик а.а – Б.Төмөрбаатар а.х