Цэргийн арслан Б.Ганзориг түрүүллээ

“Увс нуур” дэвжээний энэ сарын барилдаан өнгөрөгч Бямба гарагт боллоо. Энэ удаагийн барилдааныг Увс аймгийн Улаангом сумын харьяат Монгол Улсын үнэн зоригт харцага Өлзийтогтохын Бат-Оршихын нэрэмжит болгон зохиосон бөгөөд “Разма импекс” ХХК-ий зааланд боллоо. Энэ заал шинээр ашиглалтад орсон бөгөөд цаашид Увс нуур дэвжээний бөхчүүд энд бэлтгэл сургуулилтаа тогтмол хийх ажээ.
Барилдаанд аймгийн хурц арслан Ш.Шинэбаяр, Б.Одгэрэл, О.Гантулга, цэргийн арслан Б.Ганзориг, аймгийн арслан П.Мөнхбат, С.Ерөөлт, Н.Ганзориг нараар манлайлуулсан хүчит 64 бөх барилдав.
Хоёрын даваанд Увс аймгийн Тэс сумын харьяат аймгийн начин Ц.Мөнхбаяр аймгийн арслан Т.Сүрэнжавыг, Увс аймгийн Цагаанхайрхан сумын харьяат аймгийн начин Т.Мөнх-Эрдэнэ аймгийн арслан Д.Энхбаярыг, Өвөрхангай аймгийн Нарийнтээл сумын харьяат аймгийн начин С.Батсайхан аймгийн арслан Б.Ганболдыг, Увс аймгийн Давст сумын харьяат аймгийн начин Э.Элбэгбаяр аймгийн заан Б.Болдбаатарыг тус тус өвдөг шороодуулав.
Гурвын даваанд хурц арслан Ш.Шинэбаяр аймгийн начин С.Батсайханыг амлаж хоёр бөхийн барилдаан хоёр ч удаа маргаантай болж гурав дахь удаад арслан давсан бол Дорнод аймгийн арслан П.Мөнхбат Өвөрхангай аймгийн арслан Ц.Чимэддоржийг амлаж мушгиж тонгороод давав. Мөн аймгийн арслан С.Ерөөлт аймгийн начин Т.Мөнх-Эрдэнийг амлаж суйлаад дутуудаж өөрөө өвдөглөсөн бол аймгийн начин Ц.Мөнхбаяр аймгийн арслан Н.Ганзоригийг давхар тохоход ард нь дараад давав. Тунасан хоёрын барилдаанд аймгийн начин Э.Элбэгбаяр шахаж татаад давлаа.
Дөрвийн даваанд хурц арслан Ш.Шинэбаяр аймгийн начин Т.Мөнх-Эрдэнийг дагаж тахимдаад, Б.Одгэрэл аймгийн начин Ц.Мөнхбаярыг зүүн хавираад, О.Гантулга аймгийн начин Э.Элбэгбаярын ард гараад тус тус өвдөг шороодуулсан бол цэргийн арслан Б.Ганзориг аймгийн арслан П.Мөнхбатын хөлийг авч дэрлэж дараад давснаар их шөвөгт шалгарав.
Их шөвгийн барилдаанд цэргийн арслан Б.Ганзориг хурц арслан Ш.Шинэбаярыг зүүн хонгодоод давсан бол тунасан хурцуудын барилдаан сонирхолтой болж О.Гантулгыг мушгиад дутуудахад Б.Одгэрэл тэр чигт нь хөндлөн түрээд орхисноор үзүүр булаалдахаар шалгаран үлдэв.
Үзүүр булаалдах барилдаанд Б.Ганзориг мөн л зүүн хонгодож давснаар энэ өдрийн түрүү бөхөөр тодорч аймгийн хурц арслан Б.Одгэрэл үзүүрлэлээ.
Дүйзийг гурвын даваанаас үзнэ үү.
Гурвын даваа
1. Ш.Шинэбаяр а.х.а – С.Батсайхан а.н
2. Б.Одгэрэл а.х.а – Х.Алтансүх а.з
3. О.Гантулга а.х.а – Н.Нямбуу а.з
4. Б.Ганзориг ц.а – О.Бундхорол а.х
5. П.Мөнхбат а.а – Ц.Чимэддорж а.а
6. С.Ерөөлт а.а – Т.Мөнх-Эрдэнэ а.н
7. Н.Ганзориг а.а – Ц.Мөнхбаяр а.н
8. Х.Оргилболд а.а – Э.Элбэгбаяр а.н
Дөрвийн дараа
1. Ш.Шинэбаяр а.х.а – Т.Мөнх-Эрдэнэ а.н
2. Б.Одгэрэл а.х.а – Ц.Мөнхбаяр а.н
3. О.Гантулга а.х.а – Э.Элбэгбаяр а.н
4. Б.Ганзориг ц.а – П.Мөнхбат а.а
Тавын даваа
1. Ш.Шинэбаяр а.х.а – Б.Ганзориг ц.а
2. Б.Одгэрэл а.х.а – О.Гантулга а.х.а
Зургаагийн даваа
1. Б.Одгэрэл а.х.а – Б.Ганзориг ц.а

МУИС-ийн оюутан Т.Түмэндэмбэрэл