Сумын начин Т.Эрхэмбаяр: Орон нутагт барилдаан тэр бүр болдоггүй

-Шинэхэн начинд уншигчдынхаа өмнөөс баяр хүргэе.
-Баярлалаа. Сумын начин цол хүртсэндээ баяртай байна. Үндэсний бөхийн спортоор хичээллээд гурав дөрвөн жил болж байна. Өнгөрсөн хугацааны хөдөлмөрийн үр шимээ амсан өнөөдөр цолонд хүрлээ. Сайхан байна.
-Бөхчүүд бэлэг дэмбэрэл бодох нь олонтаа. Аваргатай амьдаа юм байна?
-Тиймээ.Энэ жил аварга болоход маш их баярлаж бэлгэшээсэн. Миний мэдэх Эрхэмбаяр нэртэй хүмүүс ихэнх нь  барилддаг, ноцолддог хүмүүс байдаг юм. Би чөлөөт, жудо бөхөөр хагас жил хичээллэж байгаад үндэсний бөхөөрөө барилдах нь зүйтэй юм байна гээд энэ чиглэлдээ илүүтэй анхаарч байгаа.
-Бөхийн эрдмийн А үсэг заасан анхны багш тань хэн бэ?
-Би Улаанбаатар хотод сургууль төгссөн. Бөхийн гараагаа “Алдартан” клубээс эхэлж байлаа. Надад бөхийн эрдмийн А үсгийг анхлан заасан багш маань Монгол Улсын заан Буманбаяр.  Их сургууль уул уурхайн ашиглалтын инженер мэргэжлээр дүүргээд одоо Ноён суманд уурхайд ажиллаж байгаа.
-Удам дагаж бөх гэдэг танайханд барилдаж ноцолддог хүн бий юу?
-Манай ээжийн талд сумын заан цолтой бөхчүүд бий.Аавын талд ч ялгаагүй сайхан барилддаг залуучууд цөөнгүй бий.
-Нийслэлд заалны барилдаанууд тогтмолжиж, залуучууд байнгын бэлтгэл сургуулилт сорилго барилдаануудтай байх болсон. Орон нутагт ямархуу байдаг юм болоо?
-Тэр тал дээр жаахан маруухан шүү. Үндэсний бөх гэдэг хэдэн зуун дамжсан агуу спорт. Залуучуудаа дэмжээд барилдах боломжийг нь бүрдүүлж өгөх хэмжээний тэмцээн тэр бүр болохгүй юм даа. Манай суманд уг нь барилддаг залуучууд олон бий. Нутгийн ах Мэндбаярын санаачлан зохион байгуулж байгаа энэхүү сумын аварга шалгаруулах барилдаан  хоёр дахь жилдээ зохион байгуулагдаж байна. Ноднин би шөвгийн дөрөвт үлдэж байсан. Энэ дашрамд бусдаас түрүүлж санаж, сэдэн нутаг орныхоо залуучуудыг дэмжиж байгаа Мэндбаяр ахдаа талархлаа илэрхийлье.
-Баярлалаа. Спортын амжилт хүсье.
У.Энхмаа