“Жавхлант шарга” МСУХ-ны нарийн бичгийн дарга Ө.Хүдэрхангай:Ямар ч уралдаан зохион байгуулсан албан ёсны зөвшөөрөл авах ёстой

-Холбооны нарийн бичгийн даргаар улиран сонгогдлоо. Тэгэхээр өнгөрсөн хугацаанд сайн ажилласан хэмээн тэргүүлэгчид дүгнэжээ дээ? 
-Сүхбаатар аймгийн “Жавхлант шарга” МСУХ-ны нарийн бичгийн даргын үүрэгт ажлыг 2012 оны 10 сард хүлээн авсан. Түүнээс өмнө тэргүүлэгчээр ажиллаж байсан. Харьцангуй богино хугацаанд ажилласан ч төв холбооны бодлого, шийдвэрийг хэрэгжүүлэх тал дээр анхаарч, шинэ жилийн цэнгүүн зохион байгуулж оны шилдэгүүдээ шалгаруулан “Жавхлант шаргын хурд” МСУХ-ныхоо нэрэмжит уралдаанаа зохион байгууллаа.
-Аль ч газрын МСУХ өдөр тутмын үйл ажиллагаатай ажил ихтэй болсон?
-Тэр ч үнэн шүү. Хүмүүс МСУХ гэхээр уралдаан зохион байгуулах үүрэгтэй гэж ойлгодог  юм шиг байгаа юм. Гэтэл морин спорт идэвхижиж байгаа өнөө үед улс аймаг, сум гээд аль ч шатны уяачдын холбоо өдөр тутмын үйл ажиллагаатай байнгын ажилтай байх болсон. Хамгийн наад зах нь энэ чиглэлийн мэдээллийн хэрэгслүүдээ цаг үеийн мэдээллээр хангах асуудал байна.
-“Жавхлант шарга” МСУХ-ны III бага хурлаар дүрмэндээ өөрчлөлт оруулсан. Ямар шинэ зүйл заалтууд нэмэгдсэн бэ?
-Холбооны дүрмийг шинэчлэн боловсруулахдаа ММСУХ-ны болон Өвөрхангай аймгийн “Аравгар хээр”, Дорнод аймгийн МСУХ-нуудын дүрэм журмуудыг харж, харьцуулан өөрийн аймгийн онцлогт тохируулан шинэчилсэн. Жишээлбэл тэргүүлэгчдийн татварын хэмжээ, түүнийг хэрхэн биелүүлэр тухайд шинэ заалтууд туссан. Өмнө нь манай холбооны тэргүүлэгчид жилийн 300,000 төгрөгийн татвар төлдөг байсан бол шинэ дүрмээр  1 сая төгрөг болж, түүнийгээ тухайн жилийн нэгдүгээр улиралд багтаан төлснөөр эрх баталгаажихаар тусгаж өгсөн. Ийм заалт оруулаагүй байхад тэргүүлэгчид татвараа төлөхдөө ихээхэн хойрго хандаж, зарим нь төлдөггүй байсан. Тиймээс дээрх заалт энэ дутагдлыг засна гэж бодож байгаа. Түүнчлэн Сүхбаатар аймгийн нутаг дэвсгэр дээр зохион байгуулагдаж буй аливаа уралдаан заавал “Жавхлант шарга” МСУХ, тухайн орон нутгийн захиргааны зөвшөөрөлтэйгээр зохион байгуулагдаж байхыг дүрмэндээ тусгасан. Өөрөөр хэлбэл ямар нэг байдлаар уралдаан зохион байгуулах бол заавал аймгийн МСУХ болон тухайн орон нутгийн удирдлага, салбар холбоодод саналаа хүргүүлсэн байх ёстой. Мөн дүрмэнд тусгасан өөр нэгэн шинэ заалт бол оны шилдгүүдийг тодруулах журам. Өмнөх заалтуудаа шинэчилж оны шилдэг гал гэсэн шинэ номинацийг оруулсан. Энэхүү заалтыг оруулахаас  өмнө сумдаасаа судалгаа авахад нэг сум гэхэд багадаа 2-3 галтай болчихсон байх жишээтэй. Нэгдсэн зохион байгуулалтанд орсон эдгээр уяачдаа урамшуулж дэмжихийн тулд шилдэг гал номинацийг оруулсан. Мөн холбооны бодлого чиглэлийг дэмжиж үйл ажиллагаандаа идэвхтэй оролцдог тэргүүлэгчдээ урамшуулах зорилгоор “Оны шилдэг тэргүүлэгч” гэсэн номинаци нэмэгдсэн. Түүнчлэн шилдэг унаач хүүхдүүдийг сум бүрээс тодруулахаар болсон. Яагаад гэхээр морь айрагдаж түрүүлэхэд уяач эзнээс гадна унаач хүүхдийн үүрэг роль их. Тэгээд ч морь унах хүүхдүүд хомсдож байгаа энэ үед тэднийг урамшуулан дэмжих бодлого баримтлах нь зүйтэй гэж үзсэн.
-Сайхан санаа байна. Хурдан морь унаач хүүхдийнхээ аюулгүй байдлыг хамгаалах тухайд ямар төлөвлөгөөтэй байгаа вэ?
-Хүүхдийн амь нас аюулгүй байдлыг хангах тухайд холбоо нэлээд анхаарал хандуулж байгаа. Цаашид ч энэ талаар илүүтэй анхаарах болно.Эхний ээлжинд унаач хүүхдийг хамгаалалтын хувцас хэрэгслээр хангахад анхаарч хяналт тавьж байгаа. Өнгөрсөн жил манай аймгийн 70 жилийн ой болж, тэр үед морь унасан бүх хүүхдүүдийг хамгаалалтын хувцас  хэрэгслээр хангасан. Энэхүү хөтөлбөрт 800 гаруй хүүхэд хамрагдсан гэсэн судалгаа байгаа. Түүний дараа уралдааны зохион байгуулалт дээр анхаарч хүүхдийн аюулгүй байдлыг хангаагүй бол тухайн уралдааныг хориглох хязгаарлах бодлого барихаар яригдаж байна.
-Тэгвэл ирэх дөрвөн жилд хэрэгжүүлэхээр ямар томоохон зорилт тавиад байгаа вэ?
-Ярьж төлөвлөж байгаа зүйлүүд цөөнгүй бий. Тэргүүлэгчдийн хурлаар хэлэлцэж байж эцсийн шийдвэр гарах учраас одоогоор түрүүлж задлах боломж алга.Ямар ч байсан аймгийн морин уралдааныг хөгжүүлэх, уяачдаа хөгжүүлэх, тэдний хөдөлмөрийг үнэлэх, хүүхдийнхээ аюулгүй байдлыг хангах гээд тухай бүрт нь санаж сэдэж төлөвлөсөн зүйл бий.
-Баярлалаа. Та бүхний ажилд амжилт хүсье.
"Тод магнай" сэтгүүл №42