Өсөх зээрд

Дааганы уяаг даамай сайн тааруулдаг гэгддэг Тод манлай уяач Тангаа хэмээх А.Батсүхийн унаган зээрд үрээ улсын наадамд айргийн таваар хурдалсан. Зээрд үрээний эцэг Гоё халзан ОХУ-д зохиогдсон хоёр ч уралдаанд аман хүзүүдэж байсан Англи азарга байдаг. Халзан азарга өөрөө хурднаас гадна үр төлүүд нь ч гэсэн цахиур хагалан хурдалж байгаа бөгөөд 2011 он буюу АХ-ын 90 жилийн ойн баяр наадамд түрүүлсэн МУ-ын Алдарт уяач “Гацуурт” ХК-ийн захирал Л.Батмөнхийн хээр, айргийн дөрөвт хурдалсан А.Төгсбатын халтар зэрэг нь түүний төлүүд юм. 
Харин зээрд үрээний эх нь Тод манлайд  хурд таригч “Эмгэн” хүрэн гүүнийх нь  төл хонгор гүү байдаг гэх юм билээ. Даага, шүдлэндээ уягдалгүй өнжиж өнөө жилээс уягдан хурдалж буй зээрд үрээ дэвжихийн бэлгэдэл Өсөх хэмээх нэртэй агаад Өмнөговь аймгийн Засаг дарга Бадамгаравын Бадраагийн нэр дээр уралддаг. Улсын наадамд үзүүлсэн амжилтаа төвийн бүсийн уралдаанд давтан баталж, хэдхэн хоногийн зайтай улс бүсийн наадмаас хоёр айраг хүртсэн Өсөх зээрд эзэндээ улсын наадмын анхны айргийг амсуулжээ.

А.Мөнх