Монгол бахархлын өдрөөр харваачид цэц мэргээ сорилоо

А.Тэлмэн
2013 оны 11-р сарын 05 -нд

МУ-ын Ерөнхийлөгчийн санаачлагаар Билгийн тооллын өвлийн тэргүүн сарын шинийн 1-нийг Эзэн Чингис хааны мэндэлсэн өдөр хийгээд Монгол бахархлын өдөр болгон тэмдэглэж байхаар болсон билээ. Энэ өдөр Чингис хааны дэлхийн академийн нэрэмжит өвлийн харваа сурын талбайд амжилттай болж өндөрлөлөө. МУ-ын мэргэчүүл, спортын мастерууд, залуу харваачид гээд 60 гаруй сурчид хасаа, товх харваанд тус тус 20 сум тавьж өрсөлдөж:
Эрэгтэй харваачдаас:
1. МУ-ын мэргэн, “Монгол ус” төрийн өмчит үйлдвэрийн газрын харваач Б.Баярсайхан /Алдар/- 33 оноогоор
2. МУ-ын спортын мастер, ХУД-ийн харваач Д.Ганбат /Петровис/- 31 оноогоор
3. МУ-ын спортын мастер, Багануур дүүргийн цахилгаан түгээх станцын харваач Н.Өлзийбилэг-30 оноогоор
4. МУ-ын спортын мастер, Монбээс компанийн харваач Ш.Мягмар /Алдар/ -30 оноогоор
5. МУ-ын спортын дэд мастер С.Тэс /Алдар/
Эмэгтэй харваачдаас:
1. МУ-ын спортын мастер, Чингисийн академийн харваач С.Өлзийжаргал -33 оноогоор
2. МУ-ын Гоц мэргэн, Чингисийн академийн харваач Х.Оюунчимэг -33оноогоор
3. МУ-ын мэргэн, “Жем интернэйшнл”-ийн харваач С.Энхтунгалаг /Алдар/
4. МУ-ын мэргэн “Жем интернэйшнл”-ийн харваач Б.Норжмаа /Алдар/
5. МУ-ын спортын дэд мастер Пүрэвсүрэн нар тус тус эхний таван байрыг эзэлж алт, мөнгө, хүрэл медаль, өргөмжлөл, мөнгөн шагналын эзэд боллоо. Шагналыг Чингис хааны академийн тэргүүн П.Давааням гардуулсан юм.  Энэ үеэр бид П.Даваанямтай уулзаж, цөөн хором ярилцсанаа хүргэж байна.
-Чингис хааны Дэлхийн академийн нэрэмжит анхны харваа болж байна. Сэтгэгдлээсээ хуваалцана уу? -Манай академиас анх удаа нэрэмжит харваагаа зохион байгуулж байна. Энэ бол дэлхийн том өв соёл гэдэг талаас нь дэмжин ажиллахаар болж байгаа юм. Үүнийхээ бодит илэрхийлэл болгож энэ жилээс эхлээд уламжлал болгон жил бүрийн арваннэгдүгээр сарын 4-нд өвлийн харвааг явуулахаар болж байна. Манай Чингис хааны дэлхийн академийн дэргэд харваачдын баг бий. Баг маань сүүлийн гурван жилийн турш улсын наадмын “түрүүг” дараалан авлаа. Энэ харваачдын багийг МУ-ын спортын мастер Сүхбат, гоц мэргэн Оюунчимэг нар удирдан ажиллуулдаг юм. Бид хэдийгээр оюуны байгууллага ч нэр хүнд, дадлага туршлага бүхий спортын нийгэмлэгүүдтэй өрсөлдөөд тэргүүлж байгаагийн маань нууц нь тун энгийн. Бид монгол харваачдын хүн төрөлхтний түүхэнд байгуулсан гавьяаг мэдэж байгаа учраас энэ талаас нь харваачдаа бэлтгэдэг. Ер нь ямар нэг ажил төрлийг амжилттай явуулахад итгэл үнэмшил хамгийн их нөлөөтэй. Үүнийг манай харваачдын амжилтаас харж болно.
-Та харваачдаа дэмжиж наадмаар сурын талбайгаар ирдэг үү?
-Манай академийнхэн ирнээ. Би бол арын албаны хүн гэх үү дээ. Аливаа нэг юманд амжилт гаргахад хамгийн том юм бол ёс байдаг. Тэр ёсыг өчүүхэн төдий алдвал амжилт тэр дороо л алга болдог. Тийм учраас энэ ёсыг морь, бөх, сур аль нь ч ялгаагүй сахих ёстой. Үүгээрээ манай академи ялгарч чаддаг гэж боддог. Манай Оюунчимэг мэргэний хувьд ёсыг барих талаараа магтаж байгаа юм биш, түрүүлэхээс өөр аргагүй хүн дээ. Энд бүхэл бүтэн школ яваа юм шүү дээ.
-Өнөөдөр хичнээн харваач оролцож байна вэ. Эндээс улсын цолтнууд хэд байна?
-Өнөөдрийн харваанд МУ-ын мэргэн Гоц мэргэн Х.Оюунчимэг, МУ-ын мэргэн Ц.Хүдэрчулуун, Б.Норжмаа, Болдбаатар нарын түүхийн нэгэн үеийг төлөөлж байгаа харваачид оролцож байгааг хараад баярлаж байна.
60 орчим харваач байна гэсэн байхаа. Эндээс ихэнх нь улсын цолтнууд байгааг хараад аваргуудын шигшээ харваа болж байна уу гэж бодлоо. Үнэхээр “томчууд”  цугларчээ.  Сурын холбооныхон болоод сурчид маань эзэн хааныхаа мэндэлсэн өдөрт ач холбогдол өгч өргөн бүрэлдэхүүнтэй оролцож байна. Бидний хувьд эрэгтэй, эмэгтэй тус бүр таван байрыг шалгаруулж, алт, мөнгө, хүрэл медаль, өргөмжлөлийн хамтаар харваачдынхаа амжилтыг мялааж байгаа.
-Сүүлийн асуултыг танд үлдээж байна. Ярилцсанд баярлалаа.
-МУ-ын Ерөнхийлөгч тангараг өргөхдөө “Монгол улсыг мөнх тэнгэр ивээг” гэж хэлсэн. Бидний өвөг дээдэс мөнх тэнгэртээ ивээгдэж язгуурын ёсоо сахиж, аав ээжээ ачлан шүтэж, ахуй төрөөр иргэнээ дээдэлж, эх нутгаа хүндэтгэн тахиж, ёс уламжлалаа дэлхийд мандуулж, үр хүүхдээрээ гайхамшгийг бүтээлгэж, өөрөөр нь өөрийг нь нээлгэж, шинжлэх ухаанд нэн сайн болгож дэлхийд тэргүүлэх улс болоорой хэмээн агуу том зарлигийг айлдсан нь бий. Иймийн тулд язгуурын ёсоо сахиж, Монгол улсаа дэлхийд тэргүүлэх улс болгоход өөрийн хувь нэмрээ оруулахыг эрхий мэргэн харваачид, тэдний гэр бүл, үр хүүхдүүдэд уриалах байна. Танай хамт олон ч гэсэн сурын хөгжилд хувь нэмрээ оруулж байгаад талархаж, ажлын өндөр амжилт хүсье. Энэ бол дэлхийн хөгжил юм. Бидний мөнх тэнгэр ивээг ээ.

П.Ундраа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна