Шилдэг адуучин С.Батсуурь: “Адуучин” тэмцээнээс алт, мөнгөн медаль хүртлээ

МУ-ын Ерөнхий сайдын ивээл дор, Монгол улсын  шилдгийн шилдэг Уран уургач, Бугуйлч, Эмнэг хангал сургагч шалгаруулах “Адуучин” тэмцээн  аравдугаар сарын 6-нд Хүйн долоон худагт амжилттай болж өндөрлөсө. Монгол орны 4 зүг, 8 зовхисоос ирсэн шилдэг 21 адуучин “Эр зориг” буюу уурга, ташуур шүүрэх, морьтой буюу явган шургуулж уургалах, бугуйлдах, эмнэг хангал булгиулах дөрвөн төрлөөр өрсөлдсөнөөс Сэлэнгэ аймгийн адуучин С.Батсуурь Уран бугуйлчийн төрөлд алтан медаль, нийлбэр оноогоор хоёрдугаарт эрэмбэлэгдсэн юм. Ингээд түүнтэй ярилцсанаа хүргэж байна.
-Шилдэг адуучдын нэгээр шалгарсанд баяр хүргэе?
-Баярлалаа. “Тод магнай” сэтгүүлийн уншигчид болох 21 аймгийн морины төлөө сэтгэл зүрхээ зориулсан нийт уяачид, адуучдадаа энэ өдрийн мэндийг хүргэе. Монгол орны өнцөг булан бүрээс ирсэн шилдгүүд цугласан гэдэг утгаараа тэмцээн нэлээн өрсөлдөөнтэй боллоо. Улсын аваргад оролцож байсан зургаа, долоон адуучин ирсэн байлаа. Үнэхээр шижигнэсэн энэ залуучуудын дунд би хамгийн ахмад нь болж таарсан. Тэгэхээр залуустай өрсөлдөөд уран уургач бугуйлчийн төрөлд түрүүлж, нийлбэр оноогоор мөнгөн медалийн эзэн болсондоо баяртай байна. Энэ бол хүний амьдралд тохиох ховорхон аз завшаан гэж бодож байгаа.
-Өөртөө хэр итгэлтэй байв? Бэлтгэл хангалттай байв уу?
-Бэлтгэл хангалттай байгаагүй. Эндээс шүүрэлтийн бэлтгэл хийгээгүй байсан болохоор жоохон оноо алдсан. Гэхдээ өнгөрсөн зун Булган аймагт болсон Батлан хамгаалахад туслах нийгэмлэгээс зохион байгуулдаг уран уургач бугуйлчийн тэмцээнд бугуйлын төрөлд түрүүлсэн. Тэгэхээр огт бэлтгэл хийгээгүй гэж хэлж болохгүй юм байна.
-Тэмцээний зохион байгуулалт ямар санагдсан бэ?
-Энэ бол нэр хүндтэй сайхан тэмцээн байлаа. Цаашдаа уламжлал болгон явуулна гэдгийг сонсоод баярлаад л байна. Зохион байгуулалтын хувьд ч сайн байлаа. Тэмцээний дараа бид Ерөнхий сайдтай хээрийн цай уусан. Тэр үеэр манай адуучид морь уургалсан юм уу бугуйлдсан хүн нь бариад ногтолдог байж болох юм. Хөдөөгийн залуус адуугаа эдлэхээ байсан энэ цагт  үлгэр дуурайлал болох сайхантэмцээн байлаа. Гадны жуулчдад энэ тэмцээнээр дамжуулан уламжлалт өв соёлоо таниулж болох юм гэхчилэн санал бодлоо солилцсон.  Цаашдаа илүү өргөн хүрээтэй, өгөөжтэй сайхан тэмцээн болох байхаа. 
-Хэсэгтээ баяр хүргэсэн дуудлаганд дарагдав уу?
-Тэгэлгүй яахав. Нутаг орныхон маань намайг их сайхан хүлээж авсан.
-Нууц биш бол шагналын мөнгөө юунд зарцуулах болоо?
-Энэ бол адуучин бидний хөдөлмөрийг үнэлсэн сайхан хэрэг байлаа. Шагналын мөнгөө гэр бүлдээ л зарцуулна даа. Мэдээж амжилтаа нутгийн олонтойгоо хуваалцаж бяцхан цайллага хийсэн.
-Энэ нь Батсуурь тамирчны хувьд хэд  дэх тэмцээн болж байна вэ?
-Найм дахь нь болж байгаа юм. Анх 2003 онд Төв аймгийн Алтанбулагт болсон улсын аваргад оролцож, бугуйл, булгианы төрлөөр түрүүлж, хоёр алтан медалийн эзэн болж байлаа. Анхны тэмцээнээс алтан медалийг ихэрлүүлсэн нь үнэхээр их урам зориг нэмсэн. Түүнээс хойш зарим нэг жил  завсарласныг эс тооцвол оролцох бүртээ л амжилт гаргаад байна. Одоогоор улсын аваргын зургаан алт, нэг хүрэл медальтай. Үүн дээр “Адуучин” тэмцээний алт, мөнгөн медаль маань нэмэгдэж байгаа юм.
-“Адуучин” тэмцээн дөрвөн төрлөөр явагдлаа. Та аль төрөлд нь илүү гэж өөрийгөө боддог вэ?
-Өнгөрсөн хугацаанд гаргасан амжилтуудаа харахаар бугуйлын төрөлд дөрвөн алтан медальтай. Дараа нь эмнэг сургалт орох юм уу. Эндээс улсын аваргын хоёр алтан медаль аваад байна. Энэ гаргасан амжилтаараа спортын мастер, Шилдэг хүлэгч болсон. Ер нь Батлан хамгаалах туслах нийгэмлэгийн бүх шагналыг л  авлаа.
 -Та уугуул нутаг Сэлэнгийн хүн үү?
-Би Увс аймгийн Зүүнговь сумын уугуул, Сэлэнгэ аймгийн суугуул хүн байгаа юм. 13 жилийн өмнө Увсаас адуугаа туугаад Сэлэнгийн Цагааннууурт ажиллаж амьдрахаар сэтгэл шулуудан нутгаасаа гарч байлаа. Тийм болохоор ямар нэг тэмцээн уралдаанд Сэлэнгэ аймгийнхаа нэрээр оролцдог юм.
-Сэлэнгийн залуучууд уурга бугуйлын төрлөөр хичээллэдэг үү. Танд гарын шавь бий юу?
-Сонирхож байгаа залуучууд олон байгаа ч амжилт гаргаж байгаа нь цөөхөн санагддаг. Миний хувьд нас явж байгаа болохоор гарын шавь бэлтгэх тухай бодож эхлээд байна. Үнэхээр дур сонирхолтой, цаашид амжилт гаргах хүсэлтэй залуусдаа мэддэг чаддагаа сэтгэл харамгүй заана гэж боддог юм. Би өөрөө гурван хүүтэй. Гэхдээ хөвгүүд маань нас бага болохоор хичээл номноосоо өөрт цаг гаргахгүй л байна.
-Хэдий үеэс адуу маллаж байгаа вэ?
-Миний ээж, аав малчин улс. Тэр утгаараа малын захад л хүн боллоо. Манай аавыг бугуйл сайн хаядаг байсан гэж нутгийнхан ярьж байхыг олонтаа сонсож байлаа. Гэхдээ би харж байгаагүй л дээ. Ер нь манай нутгийн эрчүүдийн бугуйл шидэж, тогтоож байгааг харахад бас л гайхалтай шүү дээ.  Бид чинь багадаа хонь хургаа бугуйлдаж, жаахан томроод ирэхээрээ адуу малтай ноцолдсоор өдий хүрлээ. Миний хувьд наймдугаар ангиа төгсөөд 16 настай мал дээр гарч байсан.  Одоо бол тэмээнээс бусад дөрвөн төрлийн мал маллаж байна.
-Хурдан морины уяа сойлго тааруулах уу?
-Би ч Сэлэнгийн мориныхон дундаа шинэ хүн гэх үү дээ. Гэхдээ морь уяад удаагүй ч сум орондоо ганц хоёр нас уяад бас хөөрхөн наадчихнаа.
-Бидний яриа энд хүрээд өндөрлөж байна. Ярилцсанд баярлалаа. 
-“Тод магнай” сэтгүүлээр дамжуулан намайг дэмждэг Цагааннуур сумын удирдлагууд, Сэлэнгэ аймгийн  ЗДТГ, Батлан хамгаалах туслах нийгэмлэгийн дарга Хүрэлхүү нартаа баярлаж явдагаа уламжилмаар байна.

П.Ундраа