Адууг хэмжих

Адууны чанарыг тодорхойлох ба хэв байдлыг нь мэдэх, мөн түүнчлэн зоотехникийн тодорхойлолт бичих, харьцуулалт хийхийн тулд адууг хэмждэг. Хэмжих багаж нь урт өндрийн хэмжүүр, циркуль болон сантиметрийн хуваарьтай зөөлөн тууз байна.
Адууны аж ахуйн эрдэм шинжилгээний төвөөс адууны биеийн хаанаас хаана хүртэл ямар багажаар, ямар хэмжээ авах тухай зааврыг боловсруулан гаргасан байдаг. Үүнд:
1. Урт өндрийн хэмжүүрээр мундааны өндөр /мундааны хамгийн өндөр цэгээс  газар хүртэл/, нурууны өндөр /нурууны хамгийн намхан цэгээс газар хүртэл/, хондлойн өндөр /хондлойн хамгийн өндөр цэгээс газар хүртэл/, их биеийн ташуу урт /дал бугалганы үеийн урд талын товгор дээрээс өгзөгний ар талын товгор хүртэл/, цээжний өндөр /өвчүүний ясны аймхай мөгөөрснөөс урд хөлийн араар газар хүртэл/
2. Циркулиэр цээжний өргөн /хоёр талын дал, бугалганы үеийн гадна талын товгорын хооронд/, ташааны өргөн /ташаан толгойн гадна талын товгоруудын хооронд/, хондлойн урт /ташаан толгойн урд талын товгороос өгзөгний ар товгор хүртэл/
3. Хуваарьтай туузаар хөлний өндөр /залааны товгороос газар хүртэл/, цээжний бүслүүр /далны мөгөөрсний ар өнцгийг дайруулан цээжийг бүслэж хэмжих/, шилбэний бүслүүр /шилбэний хамгийн нарийн хэсгээр бүсэлж хэмжинэ/
Өндрийг хэмжих үедээ хэмжүүрээ яг эгц байлгах, харин туузаар хэмжих үедээ туузыг аль болохуйц чангаар татахыг анхаарах хэрэгтэй.
Адууг хэмжиж байгаа үед тэгш хатуу талбай дээр зөв зогсоох хэрэгтэй.
Адууг жинлүүрээр жинлэж амьдын жинг нь тодорхойлох явдал нь үнэн зөв болох бөгөөд харин биеийн хэмжээг үндэслэн амьдын жинг бодож олох аргаар баримжаалан гаргадаг. 

А.Дөл