Дараалсан барилдаанууд болно

Маргааш буюу 12-ны өдөр Эрдэнэт хотноо хоёр жил тутамд зохион байгуулдаг “Монгол Улсын заануудын нэрэмжит” барилдаан болно. Өнөөдөр заан цолтнуудаа хүлээн авч Орхон аймагтай танилцуулж музей үзүүлэх, клипний зураг авах, нутгийн зөвлөлийн уулзалт, хүндэтгэлийн зоог барих зэрэг үйл ажиллагаа болох бол маргааш 11 цагаас Хангарьд спорт зааланд хүндэтгэлийн барилдаан эхэлнэ. Энэхүү барилдааны өмнөх барилдаанд эдүгээгийн улсын начин Төрөөгийн Баасанхүү аймгийн заан цолтой байхдаа улсын заан Д.Бумбаяр, у.з Д.Рагчаа /одоо у.г/, у.з М.Өсөхбаяр, у.з Ц.Мягмарсүрэн нарын улсын дөрвөн зааныг цувруулан орхиж түрүүлж байлаа.
Мөн 12-ны Бямба гарагт 14 цагаас Монгол Бөхийн өргөөнд сумын цолтон болон залуучуудын барилдаан болно. Өмнөх сарын түрүү П.Өсөхбаатар, үзүүр Даниа Бат-Эрдэнэ, Ховдын Г.Хишигбат, Дундговийн Э.Даш, Аваргын Л.Жамбал, Ж.Бямбадоньд, Өвөрхангайн Б.Мөнх-Өрнөх, Г.Цэнддорж, Хонгорын Г.Жамбалдорж нарын шилдгүүд дээгүүр үзэх болов уу.
13-ны Ням гарагт Баянзүрх уулын хишиг барилдаан 14 цагаас болно. Долоо дахь удаагаа болох гэж буй уг барилдаанд улсын аварга Г.Эрхэмбаяр хоёр түрүү, улсын даян аварга Г.Өсөхбаяр, улсын арслан Д.Азжаргал, улсын заан Б.Соронзонболд, улсын начин Ду.Батбаяр нар тус бүр нэг түрүүлжээ.
14-ний Даваа гарагийн 15 цагаас Хөвсгөл аймгийн Цагаан-Уул сумын уугуул, Жүдо бөхийн спортын мастер, Аймгийн заан Жасрайн Дэлгэрдалайн эмчилгээнд зориулсан аймаг, цэрэг, сумын цолтой бөхчүүдийн барилдаан, урлагийнхны хандивын тоглолт болно.
Энэхүү тоглолтын орлогыг эмчилгээний зардалд 100% зарцуулах юм байна.
Монгол бөхийн босоо цагаан хийморь ивээж түргэн эдгэрэхийг заандаа хүсье. Та бүхэн уг барилдааны тасалбарыг худалдан авахыг хүсвэл 88026356, 99140142 дугаарын утсаар холбоо барина уу.

МУИС-ын оюутан Т.Түмэндэмбэрэл