Х.Оюунчимэг мэргэн байраар шагнуулав

Намрын адаг сарын шинийн нэгэн буюу аравдугаар сарын 5-ны билэгт сайн өдөр Хэнтий аймгийн Дадал сумын уугуул, Төв аймгийн суугуул Х.Оюунчимэг Зуунмод хотод гоц мэргэнийхээ мялаалгыг хийлээ. Энэ баярт аймгийн төр захиргаа болон Монголын үндэсний сурын холбооны удирдах хүмүүс, дунд сургууль оюутан цагийн анд найзууд, Хэнтий, Төв аймгийн нутгийн төлөөлөгчид, харваачид оролцсон юм. Х.Оюунчимэг нь АХ-ын 90,91,92 жилийн ойн баяр наадмын эмэгтэйчүүдийн сурын харвааг манлайлан эмэгтэй харваачдаас анх удаа гурван жил дараалан завсаргүй түрүүлээд байгаа билээ. Төв аймгаас төрсөн алдарт харваачдын амжилтыг буухиалан яваа түүний хичээл зүтгэл, хөдөлмөрийг үнэлэн аймгийн ЗДТГ-аас хоёр байраар шагнасан нь харваачдын хувьд анхдагч болж байгаад “мэргэжил нэгт” нөхөд нь баяртай байна. Ийнхүү гоц мэргэний мялаалгаар эхэлсэн 10 сарын “буухиа”-г Монгол улсын мэргэн Батбаярын Батжаргал үргэлжлүүлэх нь ээ. Түүнд хүндэтгэл үзүүлэх үндэсний сурын харваа аравдугаар сарын 11нд Төв аймгийн Зуунмод хотноо болох гэж байна.

Улсын мэргэн П.Гарамдорж