Дүүргүүдийн Аварга шалгаруулах барилдаан боллоо

Өнөө жилийн өсвөр үеийн улсын аварга шалгаруулах барилдааныг 10 дугаар сарын 4-6-ны хооронд Сүхбаатар аймагт зохион байгуулахаар болсон билээ. Тэгвэл тус барилдаанд хотын дүүргүүдээс оролцох бөхчүүдийг шалгаруулах барилдаан өнгөрсөн бямба гарагт Монгол бөхийн өргөөнд болж өндөрлөсөн билээ.
16 нас буюу бага насны ангилалд энэ зун Архангай аймгийн наадмын өсвөрийн барилдаанд түрүүлсэн, "Аварга" лицей сургуулийн Д.Эрдэнэтулга түрүүлсэн бол Сүхбаатар дүүргээс оролцсон Т.Төртүвшинбаяр, "Аврагч" спорт хорооны бөх Б.Түвшинтөгс, Хан-Уул дүүргийн Э.Ананд, Сүхбаатар дүүргийн Б.Өсөхбаяр, Баянгол дүүргийн Д.Болдбаяр нар удаах байруудыг эзэлж улсын аварга шалгаруулах барилдаанд оролцох эрхээ авсан байна.
17 нас буюу дунд насны ангилалд Улсын даян аварга А.Сүхбатын хүү Хангай урамтай сайхан барилдаж түрүүлсэн бол, Баянгол дүүргээс оролцон Төв аймгийн Б.Төөрүүлсамбуу, өнгөрсөн жилийн УАШБ-ы 6 дугаар байрын шагналт Дорнодын Б.Лхагвасүрэн, мөн өнгөрсөн жил бага насны түрүү Сонгинохайрханы Эрдэнэбилэгийн Амартүвшин, Баянголын Э.Мөнх-Эрдэнэ, Сонгинохайрханы Д.Ёндонжамц нар 2-6 дугаар байрт шалгарч Сүхбаатарт барилдах эрхтэй болжээ.
18 нас буюу ахлах насны ангилалд Дорнод аймгийн Баян-Уул суманд өнөө жил үзүүрлэсэн, өнгөрсөн жилийн дунд насны 4 дүгээр байрын шагналт, бөхийн өргөөний өсвөрийн барилдаанд цөөнгүй удаа түрүүлж үзүүрлэж байсан Ганболдын Төрмөнх түрүүлсэн бөгөөд энэ залуу өнөө жил Сүхбаатарт нэгийг дуулгана биз ээ. Дэд байрт Баянгол дүүргээс оролцсон Т.Эрхэмбаяр, 3 дугаарт Сүхбаатар дүүргээс оролцсон Төв аймгийн И.Мандах шалгарсан байна. 4, 5, 6 дугаар байруудад Өвөрхангай аймгийн Хархорин сумын харьяат, өнгөрсөн жилийн УАШБ-д оролцож байсан Б.Содномжамц, мөн а.н Х.Гантулгын төрсөн дүү, мөн л өнгөрсөн жилийн оролцогч Х.Дашзэвэг, өнөө жил Өвөрхангайн Хайрхандулаанд түрүүлсэн Баянгол сумын харьяат Б.Гүнсумьяа нар шалгарсан байна.
Энэ барилдаанаас эхний зургаан байрт шалгарсан хөвгүүд 4-6-нд Сүхбаатар аймагт болох барилдаанд 21 аймгаас шалгарсан шилдгүүдтэй өрсөлдөнө.

МУИС-ийн оюутан Т.Түмэндэмбэрэл