М.Эрдэнэбаатар: Уяач аавын унаач хүү дээ би

Төрийнхөө их баяр наадамд унасан хүлгээ айраг түрүүнд хурдлуулсан адтай багачуудын нэг нь Дундговь аймгийн Хулд сумын дунд сургуулийн тавдугаар ангийн сурагч М.Эрдэнэбаатар байлаа. Хурдан морь унаж уралдах болсоор гурван жил болж байгаа тэрээр энэ хугацаанд том жижиг нийлсэн наадмуудаас 50 гаруй айраг түрүү аваад байгаа ажээ. Харин энэ жил АХ-ын 92 жилийн ойн баяр наадамд Дундговь аймгийн Хулд сумын аймгийн Алдарт уяач Б.Баярсайханы хээр шүдлэнг аман хүзүүнд хурдлуулсан одтой наадсан юм. Ингээд бяцхан унаачтай ярилцсанаа хүргэж байна.
-Миний дүү хаанаас ирсэн бэ?
-Би Дундговь аймгийн Хулд сумын дунд сургуулийн 5а ангид сурдаг. Анх зургаан настайдаа ааваараа заалгаж морь унаж сурч байлаа. Харин 2010 оноос хойш уралдааны морь унаж байна. Хэдийгээр томчууд шүдлэн насны морьдын уралдаан будлиантай боллоо гэж ярьж байгаа ч айрагдлаа. Сайхан байна.
-Улсын наадамд хэд дэх жилдээ ирж байна вэ?
-Хоёр дахь жилдээ ирж шүдлэнгээ айрагдууллаа. Түрүү жил Рэнцэнпүрэв ахынхаа буурал морийг унаж Цагаан хөтөл дээр дөрөв таваар давхиж яваад суугаад гуч гаргаад орж байлаа. 
-Энэ хугацаанд ямар ямар амжилт гаргаад байгаа вэ?
-Аймаг, сумын нийлсэн 50 гаруй айраг, түрүүтэй болсон. Ихэнх нь Өмнөговь, Дундговь аймаг болоод сумдын наадмаас авсан амжилт байгаа юм. Өнгөрсөн жил Өмнөговьд аймгийн Алдарт уяач А.Жаргалсайхан ахынхаа  уясан морьдыг унаж уралдсан. Ер нь аймгийн Алдарт уяач Баярсайхан, Лхагва-Очир, Жаргалсайхан, Эрдэнэтөгс  гээд уяаны ах нарынхаа морьдыг унаж уралддаг. Манайхнаас унаач Г.Энхболд бас их олон айраг түрүүтэй. Намайг улс, бүсийн наадам гээд эзгүй хойгуур “арын албыг” дааж үлдэж, айраг түрүү авдаг хүүхэд дээ. Манай үеэл байгаа юм. Бас Мөнхсайхан Говьшанхад азарга, Амартүвшин хязаалан айрагдуулж байсан мундаг унаачид бий.
-Ааваараа морь унахыг заалгаж байлаа гэсэн. Аав нь морь уядаг уу?
-Миний аав Б.Мөнхбат Дундговь аймгийн баяр наадамд азарга аман хүзүүдүүлж, Цогт-Овоогийн наадамд азарга айрагдуулж байсан уяач бий. Би чинь уяач аавын унаач хүү дээ. Аав хурдан морины уяа сойлго тааруулаад арав гаруй жил болж байгаа. Ихэвчлэн нутаг орондоо л нааддаг юм.
-Ярилцсанд баярлалаа. Дүүдээ амжилт хүсье.

П.Ундраа