Mорьтон парадын холын зочид-Алтайчууд

Энэ жил “мориныхны” хувьд үйл явдлаар дүүрэн жил болж байгаа билээ. Эндээс Монгол улсад адууны яам байгуулагдсаны 750 жилийн ойн хүрээнд Монгол адууг гиннесийн дээд амжилтанд бүртгүүлэх “Монгол морь 3000” уралдаан, 10,000 морьтны парадыг онцлохоос өөр аргагүй. Монгол орны өнцөг булан бүрээс  Хүйн долоон худгийг зорьсон олны нэг нь Говь-Алтайчууд байлаа. Тэд мянга гаруй км-ийн холоос 100 гаруй морьдоо ачин ирж оролцжээ. Харин түмэн морьтны жагсаалд Улаанбаатар хот болон ойролцоо амьдардаг Говь-Алтайнхан нэгдэж 350-иад морьтой жагсчээ. Тус аймгаас Монгол улсын Тод манлай уяач Д.Цэрэнжигмэд, Д.Ганбаатар, Х.Бат-Эрдэнэ нарын уяачид төрөн гарсан бөгөөд тэд аймгийнхнаа дэмжин идэвхитэй оролцсонд нутгийн уяачид сэтгэл хангалуун байна. Мөн УИХ-ын гишүүн Дашдорж уяач нартайгаа биечлэн уулзаж, Говь-Алтайн уяачдын “бэсрэг наадмыг” хийгээд амжжээ.

Тус аймгаас 139 морь “Монгол морь 3000” уралдааны баруун бүсэд уралдаж, Монгол улсын Алдарт уяач Гантөмөрийн бор морь айрагдсан нь  нутгийнхны хувьд баяр бахдал төрүүлсэн хэрэг болжээ.
Энэхүү арга хэмжээнд Говь-Алтай аймгийн 18 сумын уяачдын холбооноос Д.Атарбаян тэргүүнтэй Баян-Уул, Б. Авирмэд тэргүүнтэй Эрдэнэ, А.Түдэв тэргүүтэй Цээл, Н.Чилхаасүрэн тэргүүнтэй Тайшир, Х.Төртулга тэргүүнтэй Шарга сумынхан бусдыгаа тэргүүлэн идэвхитэй оролцсоныг аймгийн МСУХ-ны тэргүүн Д.Гомбожав онцолж байлаа. ММСУХ-ны тэргүүлэгчдийн зүгээс хамгийн холын аймгаас хамгийн өргөн бүрэлдэхүүнтэй оролцсон Говь-Алтайн уяачдын холбооны хамт олонд тусгайлан талархал илэрхийлсэн байна.

А.Дөл