Унаач Х.Сүхболд: 11 жил морь унахдаа айраг алдаж үзээгүй

АХ-ын 92 жилийн ойн баяр наадмын хурдан дааганы уралдаанд Говь-Алтай аймгийн Бигэр сумын уугуул, МУ-ын Алдарт уяач Л.Батмөнхийн сартай хүрэн айргийн дөрвөөр хурдлан ирсэн билээ. Хүрэн даагыг 16 настай Хүсэлбаатарын Сүхболд хүү 17,21,29 долл хурдлуулан, Батмөнх уяачийн Алдарт цолыг мялаасан энэ нь байлаа. Ингээд Сүхболд унаачтай ярилцсанаа  хүргэж байна.

-Сүхболд унаач хэд дэх айргаа хүртээд байна даа?
-Улсын наадмаас анхны айргаа сартай хүрэн даагаа дөрөвлүүлэн хүртэж байна. Үүнээс өмнө улсын наадамд Говь-Алтай аймгийн Бигэрээс ирж хэд хэдэн уралдаж байсан. Сүүлд 2008 онд аймгийн Алдарт уяач Доржнямбуу ахынхаа уясан морийг арван хэдээр давхиулж байлаа. Замын уртаас ажралгүй улсын наадмын өндөр довд уралдсан бидний хувьд тэр бол том амжилт байсан юм.
-Тэгвэл улсын наадмаас анхны айргаа авсан байх нь ээ?
-Тийм ээ. Анх удаагаа баяр наадмын өндөр довоос айраг авлаа. Бас л олон удаа наадамд ирж уралдсан шүү. Энэ бол амар олдохгүй амжилт гэдгийг энэ удаад илүү мэдэрсэн. Анхны айргаа авчихаад төв цэнгэлдэхэд цоллуулаад зогсож байхад сэтгэл зүрх минь үнэхээр их догдолсон.
-Өмнө нь Говь-Алтайгаас ирж уралддаг байв уу?
-Тийм ээ, манайх Говь-Алтайн айл. Хотод шилжиж ирээд гурван жил болж байна. Хурдан морь унасан 11 жилийн хугацаанд Бигэртээ бол айраг алдаж үзээгүй ээ, тоогоо алдчихаад байгаа.  Аймгийн Алдарт уяач Доржнямбуу бол миний авга ах байгаа юм. Энэ ахынхаа морийг Бигэрт байхдаа унадаг байлаа.
-Нутаг орондоо л нааддаг байжээ?
-Тийм шүү. Улсынхаа наадамд хаа нэг ирдэг байлаа. Үүнээс гадна холдоо 2007 онд Говь-Алтайнхаа Чандманьд очиж унасан морио айргийн таваар оруулж байсан юм.
-Хотод ирснээс хойш ямар ямар уралдаанд оролцов?
-Хотод ирээд 2012 онд төвийн бүсий даншигт Балдандоржийн хонгор морийг еслүүлсэн. Улсын наадамд арав гаргаад давхисан. Харин энэ жил Батмөнх ахынхаа даагыг айрагдуулж, азаргыг  нь 60 хэдээр хурдлуулаад байна. Наадмын дараа Төв аймгийн 90 жилийн ой, төвийн бүсийн даншиг наадамд даагаа түрүүлгэсэн. Бас төвийн бүсэд азарга арван хэдээр оруулсан. Харин бор үрээ маань өнгөлж яваад суучихаар нь татчихсан. Иймэрхүү  л сонинтой наадлаа. Дараа жилээс мориноос хасагдаж байгаа.
-Аль сургуульд сурдаг билээ?
-СХД-ийн 104-р дунд сургуулийн Цэрэндэжид багтай 11-ийн Д ангид сурдаг.
-Удахгүй сургуулиа төгсөх юм байна. Мэргэжлээ сонгочихсон уу?
-Үгүй ээ. Үнэндээ олон салаа замын дунд л зогсож байна даа. Гэхдээ уяач болмоор санагдаад байгаа. Багаасаа л уяач хүний жаргал зовлонг мэдэх болсон болохоор илүү ойр санагдаад байгаа юм. Морь унаад нэг даага, их морь бэлгэнд авсан, уяна даа. Батмөнх ах маань даагыг нь бэлэглэсэн юм.
-Ярилцсанд баярлалаа. Хүсэл мөрөөдлөө биелүүлж нутаг орныхоо нэрийг гаргасан сайн уяач болоорой.

П.Ундраа