Угалз багийн дэмбээчид илүүрхэв

Молор эрдэнэ морио дээдлэгч монгол түмний өв соёлын нэгээхэн хэсэг нь адуу, айраг дагасан дэмбээ хэмээх наадгай юм. Нутаг нутгийн дэмбээдэх ёсон, ая дан, үг хэллэг харилцан адилгүй ч дэмбээдэх соёлоор, Булган, Дундговьчууд тэргүүлдэг. Оролцогчоос ихээхэн ур чадвар авхаалж, самбаа шаарддаг энэхүү наадгайгаар бидний өвөг дээдэс зуун дамнан хөгжилдөж ирсэн бөгөөд  соёлын үнэт өвд зүй ёсоор нэрлэгддэг билээ.
Адуугаараа, айргаараа алдартай Сайханчууд /Булган аймгийн Сайхан сум/ энэ сарын 7-нд айраг үйлдвэрлэгчдийн баяраа тэмдэглэж, шилдэг дэмбээчдээ шалгарууллаа. Дэмбээний тэмцээнд нийт 48 оролцогч оролцсоны зургаа нь бүсгүйчүүд байсан нь энэ нутагт дэмбээ хэмээх наадгай ямархан цар хүрээтэй болохыг илтгэнэ. Мөн нийт оролцогчдын 20 нь Угалз багийн иргэд байсан нь тус нутагт дэмбээдэх соёл илүүтэй тархсныг илтгэх шиг санагдсан.
29 мянга гаруй буюу гурван түмэн адуугаараа улсдаа тэргүүлдэг Сайхан сумын хувьд айраг нэрийн хуудас нь. Айраг дагасан соёл дэмбээ, хуруу зэрэг нь эр, эм хөгшин залуугийн эрэмбэгүй тэгш нааддаг наадгай нь аж.
Айрагны баярт зориулсан дэмбээний тэмцээнд оролцогчид хожигдсон нь шууд хасагдах хэлбэрээр өрсөлдсөн бөгөөд тавын даваанд шигшигдэж үлдсэн гурван оролцогч тойрог хэлбэрээр өрсөлдөж Сайхан сумын уугуул, Угалз багийн дэмбээчин Банзарраднаагийн Мөнхбаяр тэргүүлэн, Сайхан сумын уугуул, Мануулт багийн дэмбээчин Нямын Золбаяр удаалж, тус сумын уугуул Иххүрэмт багийн дэмбээчин Намхайн Содгэрэл гуравдугаар байр эзэлсэн юм.
Тэргүүн байр эзэлсэн дэмбээчин 80,000 төгрөг, өргөмжлөлийн эзэн болсон бөгөөд мөн олимпийн аваргын гарын бэлгийг хүртжээ.

А.Тэлмэн