Хөвсгөлийн уяачид бүсийн наадмуудаас гурван түрүү найман айраг хүртжээ

Дэлтэй цэнхэрээ дээдлэгч далай ээжийн хийморилог хөвгүүд одтой сайхан наадан Засгийн газрын тогтоолт бүсийн наадмуудаас гурван түрүү, найман айраг хүртэн, Хөвсгөл аймгийн хурдан морины түүхэнд нэгэн шинэ амжилт тогтоолоо.
 Мөрөн сумын уугуул, аймгийн морин спорт уяачдын холбооны нарийн бичгийн дарга, аймгийн Алдарт уяач  Т.Болдбаатарын халиун соёолон Хэнтий аймаг байгуулагдсаны 90 жилийн ой, зүүн бүсийн наадмын азарганы уралдаанд хол тасран түрүүлж түмэн олноо цэнгүүлсэнийг эрхэм уншигчид санаж буй бизээ. Могой жил гарсаар хоёр бүсийн наадамд айрагдаад байсан халиун үрээ төрийнхөө их баяр цэнгэлд есөөр хурдалж, давхар уяагаар ийнхүү зүүн бүсийн уралдааныг магнайлсан нь энэ юм.
Архангай аймаг үүсч байгуулагдсаны 90 жилийн ой хангайн бүсийн уралдаанд Хөвсгөлчүүд бусдаас илүүрхэж наадсан бөгөөд Тариалан сумын уугуул, МУ-ын Алдарт уяач Гордоогийн Доржпүрэв нэг түрүү, гурав айраг хүртсэн бол, Шинэ-Идэр сумын уугуул, аймгийн Алдарт уяач Чулуунбатын Цэрэнбат нэг түрүү, хоёр айраг, Тариалан сумын уугуул Бадрахын Ганбаяр, тус сумын уугуул Батцогт нар тус бүр нэг айраг нийтдээ  хоёр түрүү, долоон айраг хүртсэн байна. Өнгөрсөн жил төрийнхөө наадамд аман хүзүүнд хурдалж, давхар уяагаар төвийн бүсийн наадамд айргийн дөрөвт хурдалж байсан Б.Ганбаярын Таван цагаан өнөө жил улсын наадамд айргийн таваар хурдалж,  хангайн бүсэд айрагдсан нь энэ юм.
Харин Завхан аймагт болсон баруун бүсийн наадамд Хөвсгөл аймгийн Галт сумын уугуул Нацагдорж буурал соёолонгоо айргийн гуравт хурдлуулж,  Цагаан-Үүр сумын уугуул Мөнхжаргалын хүрэн хязаалан хүүхэдгүй түрүүлэн,  дүрмийн дагуу тав ухарч зургаад баригдсан бол, аймгийнхаа баяр наадамд түрүүлсэн Бат-Очирын халтар азарга 11-т  хурдалсан байна.
Ийнхүү хоймор нутгийн уяачид могой жилийн уралдаануудад одтой сайхан наадан уугуул, нутгийнхаа нэрийг цуурайтууллаа.

 А.Тэлмэн