Унаач Э.Итгэл: Улсын баяр наадмаар таван насны морь унаж, соёолонгоо айрагдууллаа

-Итгэл хүүгийн унасан соёолон айргийн дөрвөөр хурдаллаа. Баяр хүргэе?
-Баярлалаа. Унасан морьдоо түрүүлгэж, айрагдуулах гоё шүү.
-Одоо хэдэн настай вэ? Аль сургуулийн хэддүгээр ангид сурдаг вэ?
- 13 настай. 59-р сургуулийн наймдугаар ангид орно
-Он гарсаар ямар амжилт гаргаад байгаа вэ?
-Энэ өвөл айрагдаагүй ээ. Харин АХ-ын 92 жилийн ойн баяр наадмаар дааганаас бусад насыг унасан. Эндээс соёолонгоо айрагдууллаа. Харин бусад нь айргаас хойгуур ирсээн. Наадмын дараа “Их хурд 6”-д Сүмбэн зээрдээ 27-оор давхиулсан. Үүнээс гурван жилийн өмнө “Их хурд 5”-д их нас түрүүлгэж, азарга гуравлуулж байлаа. Энэ амжилтаараа 2010 оны шилдэг хүүхэд болж байсан.
-Ер нь хэзээнээс эхэлж хурдан морь унаж байгаа вэ?
-Зургаан настайгаасаа эхэлж морь унаж сурсан. Хамаатны ах Балдандорж морь уядаг юм. Би энэ ахынхаа уясан морьдыг унаж уралддаг байлаа.  
-Хичнээн айраг түрүү авсан байна вэ, тоолж байв уу?
-Хурдан морь унаад долоон жил болж байгаа ч айраг түрүүгээ тоолж байгаагүй юм байнаа.
-Тэгвэл хамгийн анхны айраг түрүү хэзээ байсан бол?
-Морь унаж сураад удаагүй байхдаа Багахангайн наадамд даага тавлуулсан. Түүний дараа мөн Багахангайн наадамд нэг дор дөрвөн нас түрүүлгэсэн. Тэр үед маш их баярласан. Ер нь миний хувьд хамгийн дурсгалтай наадам тэр.
-Хамгийн их сэтгэлд үлдсэн, хамгийн хариуцлагатай уралдаан хэзээ байсан бэ?
-Их хурд. Анх удаа шигшмэл морьдын “Их хурд” уралдаанд оролцоод их өндөр амжилт гаргасандаа баяртай байгаа. Төхөөрөмжнөөс гараад эргэхэд л их гоё санагдсан. Гэхдээ түрүүлнэ гэж бодоогүй. Айрагдах л байх гэж бодож байлаа. Өмнө нь Дөлгөөн хонгорыг унаж байгаагүй болохоор тийм ч итгэлтэй байгаагүй л дээ.
-Уралдааны замд ямар бэрхшээл тулгардаг вэ?
-Гайгүй дээ. Гол нь зам сайн байх ёстой. Замд шалбааг энэ тэртэй байвал хэцүү л дээ.
-Чинийхээр унаач хүүхдүүдийн хувьд хамгийн их тулгамдсан асуудал гэвэл?
-Тийм асуудал байхгүй дээ.
-Магадгүй шантарч байсан үе бий болов уу?
-Морь унах дуртай болохоор энэ тухай бодож байгаагүй ээ. Мэдээж амжилт гаргаж чадаагүй үед харамсалтай  санагддаг ч наадам нэгээр дуусах биш дээ.
-Танай галд хэдэн унаач хүүхэд байдаг вэ?
-Манай галд наймаас дээш насны найман унаач хүүхэд бий. Энэ жил манай галаас унаач Дугарваанчиг Баян суманд  азарга түрүүлгэж, Рагчаасүрэн соёолон дөрөвлүүлсэн. Харин Баярхүү Баянжаргаланд хязаалан, даага, соёолонгоо айрагдуулсан амжилттай байна даа.
-Баярлалаа.  Унасан болгон чинь түрүүлж, айрагдаж байх болтугай.

 
П.Ундраа