Амжилтаа бататгасан мэргэчүүл, рекорд эвдсэн мастерууд төрийн наадмыг чимлээ

Их Монгол улс байгуулагдсаны 807, Ардын хувьсгалын 92 жилийн ойн баяр наадмын халх сурын харваанд Баян-Өлгий, Ховд, Сэлэнгэ, Дархан, Орхон, Дорнод, Хэнтий, Өмнөговь, Дорноговь, Дундговь, Архангай, Өвөрхангай, Төв, Булган зэрэг аймгууд болон Улаанбаатар хотын найман дүүргээс нийтдээ 360 гаруй харваач оролцож, ширүүхэн өрсөлдөөн дунд шинээр гоц мэргэн, хошой мэргэн тодрон гарсан нь энэ жилийн баяр наадмын харвааны онцлох зүйлийн нэг байв.
Эрэгтэй харваачдаас хошой мэргэн Ц.Баасанхүү, улсын мэргэн Х.Отгонбаяр, спортын мастер Б.Батбаатар нар 40 сумнаас 35 онож, товх харваанд Ц.Баасанхүү мэргэн дутааж, Б.Батбаатар мастер давуулснаар Х.Отгонбаяр мэргэн онож, баяр наадмын харваанд түрүүлэн хошой мэргэн цол хүртсэн бол Ц.Баасанхүү мэргэн, Б.Батбаатар мастер нар удаалж, 4-5-р байранд спортын мастер Н.Өлзийхутаг, Ш.Даваасүрэн нар шалгарав. Эмэгтэй харваачдаас хошой мэргэн Х.Оюунчимэг 40 сумнаас 36 онож түрүүлж, гоц мэргэний болзол хангасан төдийгүй улсын баяр наадмын харваанд гурван жил дараалан магнайлж, өвөрмөц содон амжилтын эзэн болов. Хошой мэргэн Д.Эрдэнэтуяа 35 онож, хоёрдугаар байр,  спортын мастер Э.Заяа 33 онож гуравдугаар байранд шалгарсан бол спортын дэд мастер М.Мөнх-Амгалан, Б.Пунсалдулам нар 4-5-р байрыг эзлэв.
Энэ жилийн баяр наадмын харваанд шинээр гоц мэргэн нэг, хошой мэргэн нэг, спортын мастер гурав, дэд мастер нэг төрөн гарсны зэрэгцээ Монгол улсын гавьяат тамирчин Ш.Даваахүү мэргэний шавь нар үнэхээр од хиймортой байсныг зориуд тэмдэглэж байна.
Мөн баяр наадмын урианхай сурын харваанд спортын мастер Ц.Батзориг 30 сумнаас 30 онож, урианхай сурын дээд амжилт тогтоон урамтай сайхан түрүүлсэн бол спортын мастер, дэд мастерын болзлыг 21 хүн хангаж одтой наадлаа.
Буриад сурын харваанд 140 гаруй харваач цэц мэргээ уралдуулан спортын мастер О.Сүхбаатар 64 сумнаас 63 онож түрүүлэв. Удаах байранд спортын мастер Б.Батбаатар, З.Нямсүрэн, залуу харваач Э.Ганчулуун, спортын мастер Р.Ганхуяг нар оржээ.
Эмэгтэй харваачдаас улсын мэргэн С.Энхтунгалаг 64 сумнаас 52 онож магнайлсан бол 2-5-р байранд улсын мэргэн Д.Цэцэг, спортын мастер Ч.Гандаваа, улсын мэргэн С.Баярмаа, залуу харваач Э.Оюунжаргал нар орсон байна. Ийнхүү баяр наадмын харваа амжилттай өндөрлөж, харваачид маань Төв, Архангай, Хэнтий, Завхан аймгуудын 90 жилийн ойн баяр наадмын харваанд оролцохоор уухайн дуу хадуулан нутаг нутгийн зүг хүлгийн жолоогоо залан аян замдаа гарцгаалаа.

Улсын мэргэн П.Гарамдорж