Т.Ихбаяр одтой наадаж байна

Халхын таван том даншигт түрүүлсэн Соёмбо хүрний уяа сойлгыг нэгэн цагт тааруулж, Цандэлэг уяачийг Тод манлайн цолонд хүргэж байснаар нь нийслэлийн Алдарт уяач Т.Их баярыг морины хорхойтнууд андахгүй ээ. Хурдан морины  хөгжлийн энэ цагийн өнгийг тодорхойлж яваа томчуудын нэг Д.Онон Тод манлайн гарын шавь Ихбаяр уяач хүүхэд байхын л морины хорхойтой нэгэн явсан гэдэг. Өнгөрсөн жил улсын баяр наадмын эрлийз ангилалд даага аман хүзүүдүүлж, Дундговь аймагт болсон “Их мандал 2012” говийн бүсийн даншиг наадамд азарга, их нас, хязаалан айрагдуулж, соёолон түрүүлгэсэн бол Өмнөговь аймагт болсон хаврын бүсийн уралдаанд их нас, Өвөрхангай аймгийн Есөнзүйлийн даншигт даага тус тус түрүүлгэж, хоёр хязаалан айрагдуулсан амжилтаараа шилдгүүдийн эгнээнд багтаад байсан билээ. Тэгвэл  могой жил гарсаар “Дүнжингаравын хурд 2013”-д Ч.Махвалын хүрэн азаргыг 9-өөр, их насанд С.Энхцагийн зээрийг наймлуулж,  Ж.Бат-Эрдэнийн халиун алаг соёолонг айргийн таваар, Д.Амгаланбаатарын ягааныг 11-ээр хурдлуулаад байсан юм.  Харин “Эрдэнэт хурд – 2013” хаврын бүсийн уралдаанд түүний уяж сойсон Булган аймгийн Тэшиг сумын уугуул С.Энхцагийн зээрд их насанд гуравлаж, Булган аймгийн Хутаг-Өндөр сумын уугуул Ж.Бат-Эрдэнийн халиун соёолон айргийн таваар орсон билээ. Түүний энэ амжилт АХ-ын 92 жилийн ойн баяр наадмаар их насанд Говь-Алтай аймгийн Бигэр сумын уугуул Бөөрөнхийн Амарбаясгалангийн хүрэн халзанг айрагдуулж, Улаанбаатар хотын Баянзүрх дүүргийн харьяат Цэндийн Энхтайваны хонгор халзанг аман хүзүүнд, соёолонд Улаанбаатар хотын Хан-Уул дүүргийн харьяат Г.Батсайхан сархан зээрдийг наймаар хурдлуулсанаар үргэлжлэв. Тэгвэл хэдхэн хоногийн өмнө болсон “Их хурд 6”-д түүний уяж сойсон Ц.Энхтайваны хонгор халзан айргийн гурваар, Б.Амарбаясгалангийн хүрэн халзан айргийн дөрвөөр тус хурдалж  Ихбаяр уяачийг түүхэн амжилтын эзэн болгоод байна.

А.Мөнх