Аймгийн Алдарт уяач Г.Буянтогтох: “Их хурд”-д Дөлгөөн хонгор, Сүмбэн зээрд, ухаа халзангаа мордуулна

- Төрийнхөө их баяр наадамд соёолон айрагдууллаа. 
- Тийм ээ. Улсын наадмын өндөр дов дээр Цогтсайхан ахынхаа соёолонг уяж сойн айрагдуулсандаа үнэхээр их баяртай байна. Манлай уяач Билгээ ахыгаа бурхны оронд явснаас хойш бие дааж морь уяад анхны айргаа хүртэж байгаа нь энэ. Үүнээс өмнө  уяаны бүх ажлаа ахтайгаа зөвлөж байгаад л хийдэг байсан болохоор дэндүү их үгүйлж байна даа. Гэхдээ бурхны орноос хараад баярлаж байгаа байхаа. Ах минь “төрийн наадамд морь айрагдуулна гэдэг ч бас агуу юм шүү дээ” гэж ярьдагсан. Морьд маань сунгаануудад сайн байсан болохоор битүүхэндээ юм дуулгах болов уу гэж горьдож л байлаа. Энэ дашрамд туслаж дэмжсэн галынхан, дүү нартаа баярлалаа гэж хэлмээр байна. .
- “ Агт эрдэнэ” галынхан энэ жил хичнээн насанд хэдэн морь уясан бэ?
- Манайхан зургаан насны 40 гаруй морь уясан. Эндээс зарим нь орон нутгаар наадах юм. Харин улсын наадамд 20-иод адуутай ирсэн. Гэвч ирсэн даруйдаа морьд маань жаахан ханиалгаад сандаргалаа шүү. Дээр нь ухаа халзангаа хасуулчихаад урам муутайхан суутал соёолон маань айрагдлаа. Юм гэдэг ээлжтэй гэж үнэн юмаа. Уг нь ухаа халзан маань монгол адуу л байгаа юм. Хасчихаар нь үнэхээр их гайхсан шүү.
- Улсын наадмыг залгаад бүсийн наадам үргэлжилнэ. Танайхнаас “Их хурд”-д оролцох адуу хэд хэд бий байхаа?
- Тийм ээ. Дөлгөөн хонгор маань ханиалгаад сая улсад  мордож чадсангүй. Ханиадыг нь эмчилж байгаад “Их хурд”-даа ухаа халзан, Сүмбэнтэйгээ мордуулна даа. Сүмбэн уг нь улсад мордуулах гэж байсан ч ханиагаад татуулчихсан. Сунгаануудад их сайн байсан.
- “Агт эрдэнэ”-ийхэнд дараа дараагийн наадмуудад амжилт хүсье.
- Баярлалаа. “Тод магнай” сэтгүүлийн хамт олонд ажил хөдөлмөрт бас амжилт хүсье.

А.Мөнх