Түрүү соёолонгийн унаач О.Зулбаяр: Хонгор үрээтэйгээ хоёр дахь түрүүгээ авч байна

-Баяр хүргэе. Баярынхаа сэтгэгдлээс манай уншигчидтай хуваалцаач?
-Баярлалаа. Үнэхээр гоё байна. Хүн бүр л соёолонгийн тоосонд орж, тэр жилийн од хийморио сэргээхийг хүсдэг. Энэ нь Хүй долоон худгийн ногоон дэнжид цугласан олноос төвөггүй харж болно. Соёолонгийн хөлсийг авах гэсэн хүмүүс бас л их сандаргаж байна шүү. Манайхан нэг насны морьтой ирээд түрүү магнайд хурдаллаа.
-Миний дүү хэдэн настай вэ?
-Би Өвөрхангай аймгийн Хайрхандулаан сумын 4-р дунд сургуулийн дөрөвдүгээр ангид сурдаг.
-Морь унаад хичнээн жил болж байна вэ?  
-Морь унахыг анх ааваараа заалгаж байлаа. Түүнээс хойш хурдан морь унаад дөрвөн жил болж байна.
-Энэ хугацаанд ямар ямар амжилт гаргаад байгаа вэ?
-Том жижиг олон наадмуудад оролцож байлаа. Ноднин Баян-Өлгий аймагт болсон баруун бүсийн даншиг наадамд энэ хонгор үрээтэйгээ түрүү магнайд хурдалсан. Мөн хүрэн морио дөрөвлүүлж, хул үрээгээ аман хүзүүдүүлж байлаа. Өндөр гэгээн Занабазарын Бат-Оршил өргөх наадамд хүрэн морьтойгоо гурваар орж байлаа. Энэ амжилтаа  төрийн наадмын түрүүгээр үргэлжлүүлж байгаад баяртай  байна.
-Эндээс анхны айраг түрүүгээ хэзээ авч байв?
-Одоогоос дөрвөн жилийн өмнө Хайрхандулаан сумын сургуулийн 70 жилийн ойгоос анхны айргаа хүртэж байлаа. Анхны амжилт гэдэг утгаараа их гоё санагддаг юм.
-Том болоод ямар мэргэжилтэй хүн болох вэ? Аав шигээ уяач болох уу?
-Тийм ээ миний аав Монгол улсын Манлай уяач Д.Отгоннасан байгаа юм. Аав шигээ хурдан морины уяа сойлго тааруулах гоё санагддаг ч уяач болно гэж  бодохгүй л байна. Магадгүй хоёр гурван жилийн дараа асуувал мэргэжлээ сонгочихсон байх болов уу. Одоогоор бүх мэргэжил л гоё санагдаад байгаа болохоор тодорхой хариулт алга.
-Дүүдээ амжилт хүсье.
П.Ундраа