Э.Лхагвабаяр:”Түрүүлэхгүй бол дараа нь даагаа нэхнэ ”

Төв аймгийн Заамар сумын уугуул, хурдан морь унаач Эрдэнээгийн Лхагвабаяр хүүтэй Ерөө бүсийн бага гурван насны морьдын уралдааны үеэр цөөн хором уулзаж ярилцлаа. 
-Манай уншигчдад өөрийгөө танилцуулаач?
-Намайг Эрдэнээгийн Лхагвабаяр гэдэг. Би Төв аймгийн Заамар сумынх. Таван настайдаа анх хурдан морь унаж сурсан. Энэ жил долоон настай. Хоёр жил хурдан морь унаж байгаа.
-Уг нь энэ жилээс л хурдан морь унах ёстой юм байна. Морь унахдаа айдаггүй юу?
-Үгүй ээ, харин ч би морь унах дуртай. Миний хамгийн дуртай ажил бол морь унах.
-Юу нь тэгтлээ сайхан байдаг юм бэ?
-Түрүүлж айрагдах нь.
-Хэрвээ санаснаар болохгүй бол яахав?
-Дараагийн уралдаан дээрээ даагаа нэхнэ.
-Хамгийн анх хэний ямар морийг унаж байв?
-Анх Баяраа гэдэг хүний хүрэн даагыг унаж сумандаа түрүүлээд халтар морийг нь айргийн дөрвөөр давхиулсан. Өвлийн уралдаанд морь маань олигтой давхиагүй ээ. Сая /Ерөөгийн хурд уралдаан/ эрлийз даага унаж айргийн гурваар давхиуллаа. Билгээ ахын даага байгаа юм.
-Олон газрын наадам үзсэн үү?
-Үгүй ээ, хамгийн хол нь энэ Ерөөгийн уралдаан болж байна. Намайг жаахан гээд бараг морь унуулдаггүй юмаа.
-Энэ жилээс унуулах байхаа.Болгоомжтой байж их амжилт гаргаарай. Амжилт хүсье.
-Баярлалаа.

А.Энхжил