Тэд сайхан барилдаж байгаа

Сүүлийн үеийн барилдаануудад улсын заан Ч.Батзориг, улсын өсөх идэр начин М.Жамьяанпүрэв нар тун сайн барилдаж байна. Ер нь ч тэд  муу барилддаг хүмүүс биш. Гэхдээ нас нь 40 хэвийчихсэн хэр нь ийнхүү шуугиулж байгаа нь онцлууштай юм.
40 нас гэдэг спортын хувьд тэр дундаа бөхийн хувьд ахмададаа орно.Учир нь залуу үе хүч түрж байна шүү дээ. Өнөө жил 19 настай залуу аймагт түрүүллээ,14 настай хүү суманд түрүүллээ. Энэ бол үндэсний бөх хөгжиж, залуус чангарч буйг харуулж байна. Залуусын хүчтэй давалгаа түрэн орж ирж буй энэ үед ийнхүү сайн барилдаж буй тэднээр бахархахын аргагүй.
Улсын  заан  Ч.Батзориг 10 сарын эхэнд болсон хоёр  барилдаанд нэгийн давааны учираагаа малгай шиг гаргаж ирээд "шидчихсэн". Тэгээд ч зогссонгүй Төв аймагт өнөө жил дөрөв даваад унасан, сумын шилдэг заан Б.Батбаярыг тун төвөггүй хаясан. Харин начны тухайд хоёрын даваанд Хөвсгөл аймгийн начин Б.Ундралыг барьцгүй хавираад гурвын даваанд сүүлийн үед эрс сайжраад буй аймгийн Арслан Г.Батнямыг таллаад л давчихсан.Энд би юуг хэлэх гээд байна вэ? гэхээр тэд залуусыг ичээхээр барилдаж байна. Тахимаа авч өгч байгаа нь хүртэл цаанаа л нэг сайхан.Заан хоёр барилдаанд унахдаа эргэлзээтэй унасан ч шууд  элэг бүсээ тайлсан. Харин залуус маань заримдаа яадаг билээ. Хамт уначихаад түрүүлж босоод л гүйчихнэ. Заан харин огт тэгээгүй.А .Сүхбат аварга нэгэнтээ "Өчигдөр ингэсэн бол алаваа" гэсэн гэдэг.Түүн шиг хэнийг ч хэзээ ч давж мэдэх хүн бол Жамьяанпүрэв начин.Харин зааны хувьд сүүлийн хэдэн жилийн наадмын дөрвийн даваанд аймгийн хурц арслан Ш.Мөнгөнбаатар, аймгийн арслан Давж.Батбаяр, аймгийн арслан Т.Баасанхүү нарыг хаясан. Түүнд унасан бөхчүүдийг харахад л заан маань хэнийг ч хавирдагийг мэдэж болно.

Тэд үнэхээр сайхан барилдаж байгаа.Залуус хүчтэнүүд маань бахархаасай, суралцаасай.

Гарын даа, МУИС-ийн оюутан Т.Түмэндэмбэрэл