2012 оны шилдэг унаач З.Ганзориг:Сар бүр 200,000 төгрөгийн цалин авдаг

Хөвсгөл аймгийн Төмөрбулаг сумын уугуул, хурдан морь унаач  Заяагийн Ганзоригтой цөөн хором ярилцлаа. 

-Хөвсгөл аймгийн шилдэг хурдан морь унаачтай уулзаж байгаадаа баяртай байна. Өөрийгөө манай уншигчдад танилцуулахгүй юу?
-Намайг Заяагийн Ганзориг гэдэг. Таван настайдаа унаа морь унаж сураад, есөн настайгаасаа эхлээд хурдан морь унаж байгаа. Энэ жил 15 настай. Би 2012 онд гаргасан амжилтаараа аймгийнхаа шилдэг унаач хүүхдээр шалгарсан.
-2012 оныхоо амжилтаас сонирхуулаач?
 -Аймгийнхаа баяр наадамд соёолон, азарга, их насны морьд айрагдуулсан. Гүзээ хээр морь маань айргийн дөрвөөр, хүрэн соёолон аман хүзүүнд, ногоон азарга гурваар давхисан. Харин бага гурван насны морьд маань долоогоор болон 10-н хэдээр давхиж, айрагдаж чадаагүй. Тэгээд бас Галт сумын наадамд очиж, азарга гурваар, соёолон таваар, их нас гурваар давхиулсан.Тосонцэнгэл суманд Нарийн хээр морио гуравлуулчихаад Булган аймагт болсон олимпийн аваргын мялгаалга наадамд очиж түрүүлгэсэн. 
 -Нарийн хээрийгээ юу?
-Тиймээ.Булган аймаг их гоё юм билээ. Өвс ургамал сайтай, уралдааны зам нь ч бас гоё санагдсан.
-Нэг дор олон насны морь унахаар ядрах уу?
-Манай аймгийн наадам гурван өдөр болдог. Нэг өдөр хоёр насны морь унадаг болохоор нэг их ядардаггүй ээ. Өмнө нэг өдөр олон морь унаад жаахан ядардаг байсан.
-Анх ямар наадамд хэний морийг унаж байсан бэ?
-Сумынхаа наадамд Ухнаа, Дагвадорж гэдэг хүмүүсийн алаг үрээ, бор морь хоёрыг унасан ч айрагдуулж чадаагүй. Дараа нь Гэлэгчулуун гэдэг хүний морийг унаж сумынхаа наадамд дөрвөөр давхиулсан.Ноднин жилийн таван сараас Нямбаатар ахын морьдыг унаж байгаа.
-Хамгийн холдоо хаана очиж наадаж байв?
-Сая 2013 оны хавар Улаанбаатар хотод болсон Дүнжингарав, Эрдэнэтэд болсон бас нэг том уралдаанд оролцож, хээр соёолон маань 20 гаргаж давхисан. Бас нондин Сүхбаатарын ойгоор халиун үрээнийхээ давхилыг харж наадам үзсэн. 
- Улсын чанартай наадмууд ямар санагдав?
-Их сайхан зохион байгуулалттай болдог юм билээ. Олон морь уралдаад шахалдах нь л жаахан хэцүү байсан.
-Нийслэл ямар санагдав?
-Би өмнө нь хурдан унаач хүүхдийн улсын зөвлөгөөнд аймгаа төлөөлж оролцсон. Тэгэхдээ хоттой танилцаж, “Трансформатерс” гэдэг киног нүдний шилтэй үзсэн.
-Зөвлөгөөнөөр хүүхдүүд тулгамдсан асуудлаа ярьж чадсан уу?
-Чадсан. Хамгаалалтын хувцас өмсөж уралдая гэж ярьсан. Бас биенийгээ уралдааны замд дээрлэхээ больё гээд зөндөө зүйл ярьсаан.
-УИХ-ын гишүүд хурдан морь унаач хүүхдийн эрхийг хамгаалах тухай хуулийн төсөл санаачлан хэлэлцүүлж байгаа. Үүнтэй холбогдуулан хэд хэдэн асуултанд хариулт авмаар байна. Шударгаар бас дэлгэрэнгүй хариулахыг хичээгээрэй.
-За.
-Сайн байна. Хуулийн дагуу унаач хүүхэд бай шагналынхаа 20 хувийг авах ёстой. Авч чаддаг уу?
-Авдаг. Бай шагналынхаа 20%-иас гадна сар бүр 200 мянган төгрөгийн цалин  авдаг.
-Цалингаа юунд зарцуулдаг вэ?
-Аав, ээж ар гэрийнхэндээ зориулна. Бас дансандаа хийнэ. Өөртөө ч гэсэн хэрэгтэй зүйлээ авна. 
 -Морь унаад авсан хамгийн том шагнал юу байв?
- Булган аймагт болсон олимпийн аваргын мялгаалга наадамд Нарийн хээр морио түрүүлэхэд 800 мянган төгрөг аваад өөртөө дугуй бас гар утас авсан. Тэгээд үлдсэнийг нь гэрийнхэндээ өгсөн. 
- Танай гэрт чамаас өөр морь унадаг хүүхэд бий юу?
- Байхгүй. Би айлын ганц банди. Доороо нэг дүүтэй, дүү маань эмэгтэй. 
- Дүүгээ хурдан морь унуулъя гэж боддог уу?
- Унах байхаа. Одоо л морь унаж сурч байгаа.
-Морь унаад хичээлээ цалгардуулж тасалдаг юм биш биз?
-  Гайгүй ээ. Уралдаантай үед ганц нэг удаа л тасалсан байх. Энэ хавар 9-р ангиа төгссөн.
-Ямар дүнтэй төгсөв?
- 80-аар В авсан. 
- Өндрөөрөө хэдэд жагсаж байна? 
- /инээгээд/ Хамгийн намхан нь. Манай гэрийнхэн ер нь л намхан хүмүүс. Би тэгээд дуурайсан юм шиг байгаа юм.
-Сагс волейбол гээд спортоор хичээллэдэг үү?
 -Үгүй, харин хөл бөмбөг л хааяа тоглодог. 
- Найз охинтой юу?
- Байхгүй ээ.
- Чамд өөрт чинь хурдан морь бий юу? 
- Байхгүй, хүмүүс надад хурдан морь өгч байгаагүй ш дээ.
- Яваандаа ер нь хурдан морьтой болно гэж боддог уу?
- Болно доо. 
- Намар 10-р ангидаа орно биз дээ? Ер нь ямар мэргэжилтэй болно гэж боддог вэ?
- 10-р ангидаа орно. Инженер талын мэргэжилтэй болно доо. 
- Чи хэдэн кг жинтэй вэ?
- 27 кг байсан, энэ жил 28 кг л жинтэй.
- Барилддаг уу?
- Үгүй, жижиг биетэй болохоор дийлдэггүй юм.
- Өвөл морь унах хэцүү юу? 
- Замаа сайхан засчихвал дажгүй шүү дээ.

- Олон жил морь унасан хүүхдүүд бөөр нь өвддөг болдог гэдэг. Чиний хувьд?
- Миний бөөр ерөөсөө өвддөггүй.
Ярилцсанд баярлалаа. Удахгүй болох улсын наадамд амжилттай наадаарай.

А.Мөнх